اسلام آباد۔ 12 دسمبر (اے پی پی) کل جماعتی حریت کانفرنس نا آزاد جموں وکشمیر شاخ انا اسہ ڈل اس کنوینر محمود احمد ساغر نا کماشی ٹی او آئی سی نا اسسٹنٹ سیکرٹری جنرل تون اوڑدہی کرے و اودے مقبوضہ جموں و کشمیر اٹی بھارت نا کشمیر دشمن گام گیج آتیا اسہ یات داشت اس پیش کرے۔ ڈل او آئی سی نا اسسٹنٹ سیکرٹری جنرل ءِ ہرا کشمیر نا بارواٹی او آئی سی نا خصوصی ایلچی ءِ، مقبوضہ علاقہ ٹی بھلو کچ اسے آ انسانی حق انا خلاف ورزی، آبادی نا کچ اٹ بدلی، اسمبلی حلقہ غاتا حدبندی نا پن آ متعصبانہ گام گیج و ڈغار تیا کوزہ تون اوار بھارتی سازش آتیان معلومدار کرے۔ او آئی سی نا شرفمند آ مہمان ءِ مذہبی و سیاسی تنظیم تیا پابندی و اسکول آتا بندش آن ہزار آ طالب علم آتا تعلیم ءِ مون تروک خطرہ غاتا بارواٹی ہم معلومدار کننگا۔ او آئی سی نا اسسٹنٹ سیکرٹری کشمیر کاز نا مخ تفی نا درشانی ِ ءِ کرے و اقوام متحدہ نا قرارداد آتا رداٹ کشمیر نا جھیڑہ نا ایسری آ زور شاغا۔ او آئی سی رابطہ گروپ تنظیم نا باسک ملک آتا نمائندگی ءِ کننگ ءِ و کشمیر اسہ اہم ءُ ویل اسے ہرا او آئی سی نا ایجنڈاغاٹی ءِ۔ اوکل جماعتی حریت کانفرنس نا آزاد جموں وکشمیر شاخ انا ڈل ءِ باورکرفے کہ نن دا دورہ نا پورو رپورٹ اس تیار کینہ و او رپورٹ ءِ وزراء خارجہ نا کونسل اٹی پیش کینہ۔ ڈل اٹی محمود احمد ساغر، سید فیض نقشبندی، سید یوسف نسیم، الطاف حسین وانی ، ثناء اللہ ڈار، جاوید احمد بٹ و نثارمرزا ئسک اوار ئسر۔
