اسلام آباد۔ 12 دسمبر (اے پی پی) بنجائی وزیر ڈٹ بندی ، شونداری و اصلاحات و خصوصی گام گیج پروفیسر احسن اقبال پارینے کہ پاکستان اٹی شونداری نا بابت جغرافیائی پرخ ءِ چٹفنگ شونداری حکمت عملی نا اہم ءُ جز اسے، پنچ سال اٹی پدسلوک آضلع غاتیان پسماندگی ءِ چٹفنگ نا ڈٹ ءِ۔ داخیال آتا درشانی ءِ او تینا کماشی ٹی دیوان اٹی گپ وتران کرسا کرے۔ دیوان اٹی 20 پدسلوک ضلع غاتیان تعلق تخوک آ قومی اسمبلی ناباسک آک ساڑی ئسر۔ دیوان اٹی بنجائی وزیر پارے کہ پسماندہ ضلع غاتیان پسماندگی ءِ چٹفنگ نا ڈٹ آن دا ضلع غاتیٹی زرگزرانی و راجی شونداری ناعمل ترند تر ممکن مننگ کیک۔ 20 آن 11 ضلع غاتا تعلق بلوچستان آن ءِ۔ اوپارے کہ اولیکو ریسہ ٹی جوان ڈٹ بندی نا کمک اٹ تعلیم، جان جوڑی ، توانائی و انفراسٹرکچر آ چکار کننگک۔ غیرجمہوری دور تیٹی ملک اٹی شونداری غیر مساویانہ مس و پرخ ودا۔ احسن اقبال پارے کہ پدسلوک آ ضلع غاتا قومی اسمبلی نا باسک آتا سلاہ غاتیان حقیقت آ تالان پلان اس جوڑ کننگ اٹ کمک رسینگک۔ پاکستان نا سوگوی و وحدت نا دارومدار مساویانہ شونداری آٹی ءِ۔
