اسلام آباد۔ 09 دسمبر (اے پی پی) اسلامی کمکار تنظیم (او آئی سی) نا سیکرٹری جنرل حسین ابراہیم طحہٰ وزیرخارجہ بلاول بھٹو زرداری نا سلہ غا 10 آن 12 دسمبر اسکان پاکستان و آزاد جموں وکشمیر نا دورہ ءِ کیک۔ دفترخارجہ نا ترجمان نا کنڈآن جاری بیان نا رداٹ او آئی سی نا سیکرٹری جنرل دورہ ٹی 5 باسکی ڈل انا کماشی ءِ کیک، نومبر 2021اٹی عہدہ ءِ سنبھالنگ آن پد دا اونا پاکستان نا اولیکو باقاعدہ دورہ مریک۔ تینا دورہ ٹی اسلامی کمکار تنظیم نا سیکرٹری جنرل وزیراعظم پاکستان تون اوڑدہی کیک و وزیرخارجہ تون ڈل انا کہول آ اوڑدہی کیک ، او بنجائی وزیر امور کشمیر و گلگت بلتستان، بنجائی وزیر انفارمیشن ٹیکنالوجی و وزیر واپار تون ہم اوڑدہی کیک۔ او آئی سی نا سیکرٹری جنرل آزاد جموں وکشمیر نا ہم دور ہ ءِ کیک۔ ہڑتوم آ کنڈآتا گپ وتران اٹی او آئی سی نا سیکرٹری جنرل ووزیرخارجہ او آئی سی نا ایجنڈا غا ساڑی جموں وکشمیر نا جھیڑہ، اسلاموفوبیا و اوغانستان اٹی انسانی حالیت آتون اوار ایلو امور تیا ہم گپ وتران کیرہ۔ بیان نارداٹ اونا دادورہ غان او آئی سی نا باسک ملک آتا نیام اٹ اقتصادی، راجی و تکنیکی کمکاری نا اہم امور تیا گپ وتران نا موقع ہم ملک۔ پاکستان اوآئی سی نا بانی رکن انا حیثیت آن تنظیم اٹی اسلامی یکجہتی ، سیوت و مکالمہ نا مون آ دننگ کن کوشست آتے برجاتخک۔ اسلامی کمکار تنظیم نا وزراء خارجہ کونسل نا سروک نا حیثیت اٹ پاکستان او آئی سی نا باسک ملک آتا نیام اٹ واپار، کامرس، فوڈ سیکورٹی، سائنس و ٹیکنالوجی نا بشخ اٹی کمکاری آن بیدس جھیڑہ غاتے ایسر کننگ کن او آئی سی نا امن و سلامتی نا پنجر ءِ پورو وڑاٹ فعال کننگ کن کاریم کرینے، اوغانستان ءِ سنگین انسانی امداد فراوان کننگ کن او آئی سی ٹرسٹ فنڈ اس قائم کرینے وخت اس کہ اسلاموفوبیا نا گھناؤ نہ مظاہر تون مون تننگ و کمکاری ءِ مون آ دننگ کن قائدانہ کڑد فراوان کرینے۔ بیان اٹی مستی پاننگانے کہ او آئی سی نا سیکرٹری جنرل نا دورہ داہیت آ گپ وتران نا موقع فراوان کیک کہ او آئی سی اسہ ارب 90 مسلمان تا است خواہی تے پورو کننگ کن ہراوڑ تینے پین متحرک کننگ کیک ہرانا او نمائندگی ءِ کیک۔
