شونداری و شونہالی نا کسر اٹی کرپشن اسہ بھلو اڑاند اسے، وزیراعظم شہباز شریف نا کلہو

اسلام آباد۔ 09 دسمبر (اے پی پی) وزیراعظم محمد شہباز شریف کرپشن نا ناسور نا چٹفنگ نا عزم  ءِ پوسکن کرسا داہیت آ زور شاغا کہ ہر ملک انا شونداری و شونہالی نا کسر اٹی کرپشن اسہ بھلو اڑاند اسے، کرپشن ملک انا روتہ غاتے خورک کرسا اونا زرگزرانی و انتظامی بھسکاری نا سوب جوڑ مریک، معاشرتی قدر انا زوال ہرراج اٹی کرپشن نا کچ ءِ ودفک۔ جمعہ نادے آ کرپشن تور انا جہانی دے انا وخت آ وزیراعظم پارے کہ 2022اٹی کرپشن تور انا جہانی دے آ کرپشن نا ملک اسے نا سلامتی، امن و شونداری تون براہ راست تعلق ءِ تالان کننگ انگ ءِ۔ کرپشن آن ملک و قوم انا نہادی پیسہ غاتا نئے بیرہ شرپسند زموار آتا دوتیا ہِننگ نا خطرہ ودک ہراڑان ملک انا امن بھس مریک بلکن داڑان ادارہ غاک نزور و مخلوق نا گورننس آ پت سلپک۔ اینو نادے دا قول انا پوسکنی نا دے ہم ارے کہ نن غٹ پاکستانی اواری اٹ کرپشن آن جنگ اٹ سرسہب مرین۔ مسلم لیگ ن مدام ملک آن کرپشن نا چٹفنگ کن عملی گام گیج کرے۔ 2013آن 2018، مسلم لیگ ن نا دور ءِ حکومت اٹی نئے بیرہ ملک اٹی کرپشن نا کچ شیف بس، ہرانا گواہ جہانی ادارہ ٹرانسپرنسی انٹرنیشنل نا انڈیکس ءِ، بلکن بنجائی و صوبہ پنجاب نا کہول آ ارب آ ڈالر نا سی پیک و ایلو شونداری ڈٹ آتا بناءِ کرسا ایسر اسکان سرکرےولے اسٹ اس ہم اوفتے ٹی اسہ دہ ئی اسے نا کرپشن ءِ پک کننگ کتو۔ اینو نا انسداد کرپشن دے آ ای داہیت آ ہم زور شاغیوہ کہ پاکستان نا سیاست اٹی کرپشن ءِ انتقام نا ذریعہ جوڑ کننگ نا رواج ءِ چٹفوئی مریک، تدوک آ دوراٹی ہراوڑاٹ کرپشن نا دورغ انا دوبہ خلسا سیاسی حریف آتے زندان تیٹی بند کننگا اونا درور ملیپک، کرپشن ءِ ذاتی انتقام کن ازباب نا وڑاٹ کاریم اٹ اتنگا ، داروایت بایدے چٹے تانکہ ادارہ غاتے بیرہ کرپشن نا پن آ کاریم اٹ اتنگ نا جاگہ غا سہی وڑاٹ ملک اٹی کرپشن نا چٹفنگ کن ادارہ غاتے سوگو کننگ مرے۔ وزیراعظم پارے کہ کرپشن اسہ بھاز بھلو قومی ءُ ویل اسے ، ننے تینا سیاسی گپ وتران اٹی ہم داہیت انا دھیان تخنگ نا گرج ءِ کہ دادے سیاسی نعرہ بازی و پوائنٹ سکورنگ کن کاریم اٹ اتنگ نا جاگہ غا سنجیدگی اٹ دانا ملک آن کرپشن نا توننگ نا گام گیج آتیا اواری اٹ کاریم کین۔ کرپشن نا توننگ کن غٹ سیاسی حلقہ غاتے اواری اٹ اسہ پیدوار روڈ میپ اس جوڑ کننگ ناگرج ءِ تانکہ سیاسی بیان بازی نا جاگہ غا دانا گچین وڑاٹ مقابلہ ءِ کننگ مرے۔ ننے اسلام نا روشنا اصول آتیا عمل کرسا ملک آن کرپشن نا کمتی کن ملکی ادارہ غاتے سوگو کروئی مریک، راجی رکھ و معاشرتی قدر اتون اوار اوار کانود نا بالادستی ءِ پک کروئی مریک، قائد نا کرپشن آن پاک پاکستان نا دوئی کننگ کن ننے غٹ ءِ اواری اٹ کاریم کروئی مریک ولدا گڑا پاکستان شونداری نا مزل آتے عبور کننگ کیک۔ اوپارے کہ ببو انسداد کرپشن نا دا جہانی دے آ قول کین کہ نن اواری اٹ دا تغ ءِ پورو کینہ۔