کرپشن ءِ ماس کش کننگ کن پبی و مخلصانہ کوشست کرسا اسہ سوگو و شونہال ءُ پاکستان اس مون آ بننگ کیک، صدر مملکت ڈاکٹر عارف علوی نا کلہو

اسلام آباد۔ 09 دسمبر (اے پی پی) صدر مملکت ڈاکٹر عارف علوی وڈی خوری نا بنداوی سوب آتا ڈس ءُ نشان ءِ خلنگ و وڈی خوری نا کارروائی تے بے نقاب کننگ نا گرج آ زور شاغسا پارینے کہ کرپشن ءِ ماس کش کننگ کن سنبرینگوک، پبی و مخلصانہ کوشست کرساہی اسہ سوگو و شونہال ءُ پاکستان آ مون آ بننگ کیک۔ ایوان صدر نا پریس ونگ نا رداٹ صدر مملکت داخیال آتا درشانی ءِ جمعہ نادے آ انسداد بدعنوانی نا جہانی دے انا وخت آ قوم انا پن کلہو اٹی کرے۔ اوپارے کہ راج انا غٹ تپہ غاتا کوشست آتیان بیدس کرپشن نا چٹفنگ ممکن اف، کرپشن نزوری و نیزگاری نا مون آ دننگ اٹ اہم ءُ کڑد اس ادا کیک، کرپشن نزور ملک آتے ریاستی بے سہبی نا کنڈادیک۔ صدر مملکت پارے کہ پاکستان اٹی بدعنوانی نا چٹفنگ و احتساب ءِ پک کننگ کن بھاز گڑا کننگ نا گرج ءِ، اینو بدعنوانی نا غٹ حالیت آتے چٹفنگ، نظام حکومت اٹی شفافیت و احتساب نا مون آ دننگ نا عزم انا درشانی ءِ کینہ۔ صدر مملکت پارے کہ وڈی خوری نا بنداوی سوب آتا ڈس ءُ نشان ءِ خلنگ و وڈی خوری نا کارروائی تے بے نقاب کننگ نا گرج ءِ۔ کرپشن پدتموک و شون ہلوک ملک آتے مون تروک اسہ سنگین ءُ چیلنج اسے، اخلاقی و مالی کرپشن ننا قوم ءِ مون تروک سنگین خطرہ غاتا زموار ءِ۔ اوپارے کہ راج ءِ دالعنت آن پاک کننگ کن پدریسہ کوشست، گچین چاروکی و کنٹرول، پرعزم قیادت و اسہ فعال راج اسے نا گرج ءِ، وڈی خوری دفاع ءِ نزور کیک و اقتصادی شونداری ٹی اڑاند شاغک۔ ڈاکٹر عارف علوی پارے کہ کرپشن قوم ءِ نہادی و نایاب سرکاری و نجی وسیلہ غاتیان محروم کیک، راجی و اقتصادی تفاوت ودی کیک و اقتصادی پنجر ءِ کُنیک، کرپشن ریاستی ادارہ غاتا نزوری نا ہم سوب جوڑ مریک۔ صدر مملکت پارے کہ انسداد بدعنوانی نا جہانی دے ننے وڈی خوری نا برخلاف جنگ اٹی مروک آ پیش رفت آ سجفنگ نا موقع فراوان کیک، وڈی خوری نا برخلاف جنگ اٹی سرسہبی کن پورو وڑاٹ سنبرینگوک مننگ المی ءِ۔ صدر مملکت پارے کہ کرپشن نا برخلاف برسر پیکار مخلوق نا ذہانت ، مہارت و توانائی آن فائدہ ہرفوئی مریک، راج انا غٹ تپہ غاتا کوشست آتیان بیدس کرپشن نا چٹفنگ ممکن اف، وڈی خوری نا بنداوی سوب آتا ڈس ءُ نشان ءِ خلنگ، وڈی خوری نا کارروائی تے بے نقاب کننگ نا گرج ءِ۔ صدر پارے کہ اخلاقی قدر، انصاف و غٹ اکن اسہ وڑ وارخواہی تیا تالان اصلاحات اٹی سول سوسائٹی نا کڑد اہم ءِ، انسداد بدعنوانی کن مربوط کوشست ہی گچین و پائیدار مننگ کیک، وڈی خوری تون مون تننگ ، شفافیت نا مون آ دننگ کن پارلیمانی نگرانی ءِ ودفنگ تون کانودسازی بھازالمی ءِ۔ اوپارے کہ وڈی خوری نا جاست وپاست و انصاف نا ادارہ غاتا لائخی تے ودفنگ ہم المی ءِ، اسہ سوگو سول سوسائٹی و آجو پریس السی عہدیدار آتے اوفتا اعمال نا زموار گوندنگ کن اہم ءِ۔ ڈاکٹر عارف علوی پارے کہ نن بدعنوانی نا توننگ کن اہم اسٹیک ہولڈرز و بندغ آتے بایدے یکجا کین۔