حکومت نا دانشمندانہ پالیسی تا سوب اقتصادی شونداری نا کچ اٹی نمان ودکی مسنے
اسلام آباد۔ 13مئی (اے پی پی) وزیراعظم نا ترجمان ڈاکٹر مصدق ملک پارینے کہ پاکستان مسلم لیگ (ن)نا حکومت نا مدبرانہ پالیسی تا سوب 4 سال اٹی اقتصادی شرح نمو ٹی نمان ودکی مسنے۔ اسہ نجی ٹی وی چینل اسے تون ہیت وگپ کرسا اوپارے کہ اینخو سال اقتصادی شونداری نا کچ 5درسد اسکان سرمننگ نا گمان ئِ ہراکہ اسہ بھلو سرسہبی اسے۔ اوپارے کہ امن و ایمنی نا حالیت و معیشت تون اوار غٹ بشخ آتیٹی نمان گچینی بسنے و زرمبادلہ نا کوڑی ٹی ودکی و روپئی نا قدر اٹی سوگوی ساڑی حکومت نا موثر اقتصادی پالیسی نا نتیجہ ئِ۔ ڈاکٹر مصدق ملک پارے کہ حکومت کبینی نا کچ اٹی کمتی ٹی ہم سرسہب مسنے۔ اوپارے کہ کشت وکشار و برآمد آتا بشخ آتیا خصوصی چکار تخنگ انگ ئِ و دا ہڑتوم آ بشخ آتا پیداوار اٹی ودکی کن پیکج آتا پڑو کننگانے۔ اوپارے کہ توانائی نا بشخ اٹی نمان گچینی بسنے و ملک اٹی بجلی نا لوڈشیڈنگ نا وخت ئُ پاس کم مسنے۔
