اسلام آباد۔ 08 دسمبر (اے پی پی) اسلامی کمکار تنظیم (او آئی سی) نا سیکرٹری جنرل حسین ابراہیم طحہٰ 10و 12 دسمبر آ پاکستان و آزاد جموں وکشمیر نا دورہ ءِ کیک ۔ دفترخارجہ نا ترجمان ممتاز زہرہ بلوچ پنچ شنبےنادے آ داڑے پریس حوال اٹی پارے کہ تدوک آ سال نومبر اٹی او آئی سی نا سیکرٹری جنرل نا عہدہ ءِ سنبھالنگ آن پد اونا پاکستان نا دا اولیکو باقاعدہ دورہ مریک، اسلامی کمکار تنظیم نا سیکرٹری جنرل وزیراعظم تون اوڑدہی کیک و وزیر خارجہ تون ڈل آتا کہول آ گپ وتران کیک، حسین ابراہیم طحہٰ آزاد جموں وکشمیر نا ہم دورہ ءِ کیک او وزیر امور کشمیر و گلگت بلتستان ، وزیر انفارمیشن ٹیکنالوجی ووزیر واپار تون ہم اوڑدہی کیک۔ ترجمان پارے کہ دورہ ٹی او آئی سی نا ایجنڈا غا ساڑی جموں و کشمیر نا جھیڑہ، اسلاموفوبیا و اوغانستان اٹی انسانی حالیت آتون اوار ایلو امور تیا شرہ مریک۔ اونا مسہ دے ئی دورہ غان او آئی سی نا باسک ملک آتا نیام اٹ اقتصادی، راجی و تکنیکی کمکاری آ گپ وتران نا موقع اس ہم دُوبریک۔ اوپارے کہ پاکستان او آئی سی نا بانی باسک و وزراء خارجہ کونسل نا ساڑی آ سروک نا حیثیت اٹ اسلامی یکجہتی ، سیوت و مکالمہ ءِ مون آ درسا کیک۔
