اقوام متحدہ۔ 08 دسمبر (اے پی پی) اقوام متحدہ نا جنرل اسمبلی علاقائی و جہانی امن و سلامتی ءِ سوگو کننگ کن پاکستان نا پیش کروک سلہہ غاتا چٹفنگ نا 4 قرارداد آتا منظوری ءِ تس ۔ داقرارداد آک پاکستان نا علاقائی و جہانی امن و سلامتی ءِ سوگو کننگ نا عزم انا ڈیک ءِ ایترہ۔ قرارداد آتا سفارش 193 باسکی جنرل اسمبلی نا فرسٹ کمیٹی تخفیف اسلحہ و جہانی سلامتی کریسس۔ قرارداد آتا مسودہ ءِ گیشتری مخ تفی اٹ منظور کننگاسس۔ جنرل اسمبلی ٹی پاکستان نا پیش کروک 3 قرارداد علاقائی سلہہ غاتا چٹفنگ، علاقائی و ذیلی علاقائی کہول آتیا روایتی سلہہ غاتا کنٹرول و علاقائی و ذیلی علاقائی رداٹ پت سازی نا گام گیج (سی بی ایمز) نا بابت قرارداد آک اوار ءُ وخت اس کہ چارمیکو قرارداد جوہری سلہہ تخپروک آ ریاست آتیکن جہانی سلامتی ءِ پک کننگ نا بابت ءِ۔ ’’جوہری سلہہ تخپروک آ ریاست آتا رکھ ءِ پک کننگ کن جوہری سلہہ غاتا کاریم اٹ اتنگ یا کاریم اٹ اتنگ نا خطرہ غاتا برخلاف گچین جہانی گام گیج آتا نتیجہ ‘‘ نا سرحال آن قرارداد نا مخ تفی ٹی 120 وونٹ تما و اسہ ہم باسک ملک اس مخالفت اٹ وونٹ بٹتو وخت اس کہ 60 باسک ملک آک رائے شماری ٹی بشخ ہلتور۔ قرارداد نا رداٹ ، اسمبلی داہیت ءِ امنا کرے کہ جوہری سلہہ غاتا چٹفنگ و جوہری سلہہ غاتا پورو چٹفنگ جوہری جنگ انا خطرہ ءِ مر کننگ کن المی ءِ، او جوہری سلہہ تخپروک آ ملک آتا رکھ ءِ پک کننگ کن جوہری سلہہ غاتا کاریم اٹ اتنگ یا کاریم اٹ اتنگ نا خطرہ غاتے توننگ نا بابت معاہدہ ءِ طے کننگ نا دمدستی گرج ءِ پک کرے۔ قرارداد اٹی ریاست خاص وڑاٹ جوہری سلہہ تخوک آ ریاست آتیان خواست کننگا کہ او دا بابت کانودی گام گیج کیر۔ ’’ علاقائی و ذیلی کہول آتیا روایتی سلہہ غاتیا کنٹرول ‘‘ نا سرحال آن پیش کروک قرارداد نا مخ تفی ٹی 182 وونٹ تما۔ بھارت اسٹ انگا ملک ئس ہرا دا قرارداد نا مخالفت اٹی وونٹ تس وخت اس کہ اسہ باسک ملک اس رائے شماری ٹی بشخ ہلتو۔ قرارداد نا متن اٹی علاقائی رداٹ سویلی ایشیا ٹی روایتی فوجی خطرہ نا کنڈا چکار کرفنگا و داڑتون تعلقدار خطرہ غاتون مون تننگ کن گام گیج سلاہ کننگا۔ ’’ علاقائی سلہہ غاتا چٹفنگ‘‘ و ’’ علاقائی و ذیلی علاقائی رداٹ پت سازی نا گام گیج (سی بی ایمز)‘‘ نا بابت قرارداد آتے امنائی سلاہ اٹ منظور کننگا۔ داہیت انا پیدواری ءِ کننگاکہ پاکستان کیہی سال آن علاقائی سلہہ غاتا چٹفنگ، روایتی سلہہ غاتا کنٹرول و سی بی ایمز نا ہدف آتے مون آ دننگ کن اقوام متحدہ نا کماشی ءِ کننگ ءِ۔ قرارداد آتیٹی جہانی امن، سلامتی و سوگوی ءِ مون آ دننگ کن سلہہ غاتا کنٹرول ، سلہہ غاتا چٹفنگ و پت سازی کن علاقائی و جہانی نقطہ نظر نا اہمیت ءِ امنا کننگانے و علاقائی کشیدگی ءِ کم کننگ کن علاقائی و ذیلی علاقائی کہول آتیا پت سازی نا گام گیج (سی بی ایمز) ءِ مون آ دننگ نا کوشست آتا است بڈی ءِ کننگانے۔ علاقائی و ذیلی علاقائی کہول آ تیا روایتی سلہہ غاتا کنٹرول نا بابت قرارداد اٹی دا ہیت ءِ امنا کننگا کہ ریاست آتا دفاعی لائخی تیٹی توازن ءِ برقرار تخنگ آن امن و استحکام سوگو مریک۔
