اسلام آباد۔ 08 دسمبر (اے پی پی) دفترخارجہ نا ترجمان ممتاز زہرہ بلوچ پارینے کہ پاکستان و انڈونیشیا او آئی سی نا بابت امور و تین پہ تینی است خواہی نا جہانی و علاقائی ویل آتیا گپ وتران ءِ برجاتخرہ ، اسلامی کمکار تنظیم نا سیکرٹری جنرل 10 آن 12 دسمبر آ پاکستان و آزاد کشمیر نا دورہ ءِ کیک، بھارت کشمیری تے اوفتا ناقابل تنسیخ حق خودارادیت آن محروم کرینے، بھارت نا غیرکانودی کوزہ گیری ٹی جموں و کشمیر اٹی کشمیری صحافی بھاز زور اٹ کاریم کننگ اٹی ءُ، پاکستان بلائنڈ کرکٹ ٹیم ءِ ویزہ جاری کپننگ نا بھارتی فیصلہ ٹی پاکستانی گوازی گر خصوصی اہمیت نا حامل جہانی گوازی تا ایونٹ اٹی بشخ ہلنگ کتور۔ دفترخارجہ نا ترجمان پنچ شنبے نادے آ پریس حوال اٹی پارے کہ بھارت نا غیرکانودی کوزہ ٹی جموں وکشمیر اٹی صحافیک زور اسے ٹی کاریم کننگ اٹی ءُ، اوفتے دھڑکو، جلہو و دزگیری تا مون تروک ءِ، مقبوضہ کشمیر اٹی نافذ کروک میڈیا پالیسی نا مسخت معلومداری تا آجو بہاؤ ءِ کم کننگ و میڈیا ءِ بھارت نا غلط معلومداری نا مہم نا بیرہ اسہ پروپیگنڈا اس جوڑ کننگ ءِ، کشمیری میڈیا ءِ مقبوضہ علاقہ نا اصل حالیت آتا کوریج ءِ کننگ و کل جماعتی حریت کانفرنس نا راہشون تا بیان تے شینک کننگ آن توننگانے۔ ترجمان پارے کہ منہ ہفتہ مست کشمیری فوٹو جرنلسٹ ثنا ارشاد متوءِ پلٹزر پرائز دوئی کننگ کن نیویارک آ ہِننگ آن توننگا وخت اس کہ آصف سلطان، منان گلزار ڈار، فہد شاہ و سجاد گل تون اوار پنی آ صحافی چندی زندان تیٹی غیرکانودی وڑاٹ نظر بند ءُ۔ ترجمان پارے کہ بھارتی کمامدارآتا کنڈآن پین بھاز انگا مخلوق ءِ بٹنگسا اوفتے زیزاریفنگا و اوفتے دھڑکو تننگا۔ اوپارے کہ دا ظالمانہ گام گیج مچ آ دنیا غان کشمیر آ بھارت نا غیرکانودی کوزہ نا اصل دروشم ءِ ڈکھنگ کپک۔ ترجمان پارے کہ نن 10 دسمبر ءِ انسانی حق انا جہانی دے انا وڑاٹ اڈایتنہ، نن بھارت نا غیرکانودی وڑاٹ کوزہ ٹی جموں وکشمیر نا مظلوم مخلوق ءِ بایدے یات تخن، ہموڑے انسانی حق انا خلاف ورزیک برجاءُ و بھارت کشمیری تے اوفتا ناقابل تنسیخ حق خودارادیت آن محروم کرینے۔ ترجمان بھارت نا شار ایودھیا ٹی ہندو انتہاپسند آتا دوتے اٹ تاریخی بابری مسیت نا انہدام نا 30 می برسی نا ذکر ءِ کرسا پارے کہ دا بھارت اٹی ودوک آ مذہبی بے سگی نا اسہ افسوزناک یات دہانی اسے ہرادے جہانی برادری بایدے گوجالپ۔ ترجمان نابینا بندغ آتیکن مسٹ میکو ٹی 20 ورلڈ کپ کرکٹ ٹورنامنٹ اٹی بشخ ہلنگ کن بھارت نا کنڈآن پاکستان بلائنڈ کرکٹ ٹیم ءِ ویزہ جاری کپننگ آ است ہسونی نا درشانی ءِ کرسا پارے کہ بھارتی فیصلہ ٹی پاکستانی گوازی گر خصوصی اہمیت نا حامل جہانی گوازی تا ایونٹ اٹی بشخ ہلنگ کتور۔ ترجمان پارے کہ بھارت گوازی تا مقابلہ غاتے سیاسی رنگ اس تننگ نا رواج ءِ بایدے چٹفے۔ اوپارے کہ نن داواقعہ غا تینا مایوسی و است ہسونی نا درشانی ءِ کرینن۔ ترجمان دفتر خارجہ وزیر خارجہ بلاول بھٹو زرداری نا انڈونیشیا نا برجادورہ نا ذکر ءِ کرسا پارے کہ ہڑتوم آ ملک آتا وزیر خارجہ غاک بالی ٹی مروک آ اوڑدہی ٹی ہڑتوم آ کنڈآتا تعلقداری تا حالیت آتا جاچ ءِ ہلکر و غٹ کہول آتیا ہڑتوم آ کنڈآتا مذاکرات ءِ پین سوگو کننگ و تین پہ تینی فائدہ مند کمکاری ءِ مون آ دننگ آ امنا کریر۔ ترجمان پارے کہ اِرا بھلااسلامی ملک آتا حیثیت اٹ پاکستان و انڈونیشیااو آئی سی نا بابت امور و تین پہ تینی است خواہی نا جہانی و علاقائی ویل آتیا گپ وتران ءِ برجاتخرہ۔ اوپارے کہ ہڑتوم آ وزیر خارجہ غاک وزیرخارجہ نا کہول آ اسیجائی وزارتی کمیشن (جے ایم سی) نا جوڑ کننگ کن اسہ تاریخی مفاہمتی یات داشت اسے آ دستخط کرینو۔ جے ایم سی تین پہ تینی وڑاٹ فائدہ مند کمکاری نا چاروکی ءِ کیک و ہڑتوم آ کنڈآتا باقاعدہ رابطہ غاتے مون آدیک۔ ترجمان پارے کہ اسلامی کمکار تنظیم (او آئی سی ) نا سیکرٹری جنرل حسین ابراہیم طحہٰ 10 آن 12 دسمبر آ پاکستان نا دورہ ءِ کیک ۔ ترجمان پارے کہ اسلامی کمکار تنظیم نا سیکرٹری جنرل وزیراعظم تون اوڑدہی کیک و وزیرخارجہ تون ڈل انا کہول آ گپ وتران کیک۔ حسین ابراہیم طحہ آزاد جموں وکشمیر نا ہم دورہ ءِ کیک۔ ترجمان پارے کہ دورہ ٹی او آئی سی نا ایجنڈا غا ساڑی تنازعہ جموں وکشمیر، اسلاموفوبیا واوغانستان اٹی انسانی حالیت آتون اوار ایلو امور تیا شرہ مریک۔ اونا دورہ غان او آئی سی نا باسک ملک آتا نیام اٹ اقتصادی، راجی و تکنیکی کمکاری آ گپ وتران نا موقع اس ہم دُوبریک۔ اوپارے کہ پاکستان ا وآئی سی نا بانی باسک و وزراء خارجہ کونسل نا ساڑی سروک نا حیثیت اٹ اسلامی یکجہتی ، سیوت و مکالمہ ءِ مون آ درسا کیک۔
