اسلام آباد۔ 07 دسمبر (اے پی پی) ڈپٹی اسپیکر قومی اسمبلی زاہد اکرم درانی تون چیئرمین نیشنل ڈیٹا بیس اینڈ رجسٹریشن اتھارٹی (نادرا) طارق ملک چارشنبےنادے آ پارلیمنٹ ہاؤس اٹی اوڑدہی کرے۔ اوڑدہی ٹی نادرا ناکارکڑد، خیبرپختونخوا نا سویلی ضلع غاتیٹی الس نا شناختی کارڈ آتا جاری کننگ و رجسٹریشن نا چرجوئی ٹی مون تروک ویل و ایلو امور آ گپ وتران کننگا۔ ڈپٹی اسپیکر زاہد اکرم درانی نادرا نا کارکڑد نا ستاءِ کرسا پارے کہ نادرا اسہ اہم ءُ قومی ادارہ اسے و شناختی کارڈ آتا جاری و رجسٹریشن نا چرجوئی ٹی الس ءِ گچین آسراتی فراوان کننگ ءِ۔ اوخیبرپختونخوا نا سویلی ضلع غاتیٹی شناختی کارڈ آتا جاری و رجسٹریشن نا بابت مون تروک ویل آتے ایسر کننگ نا پارت کرے۔ اوپارے کہ تحصیل میریان اٹی نادرا سینٹر مفننگ نا سوب آن دا تحصیل نا الس ءِ شناختی کارڈ انا دوئی کننگ و رجسٹریشن کرفنگ اٹ بھلو مشکل اسے تون مون تروئی تمک۔ اوتحصیل میریان بنوں ٹی نادرا سینٹر نا زوت جوڑ کننگ نا پارت کرے۔ چیئرمین نادرا طارق ملک نادرا کن سفتی آ ہیت آتیا ڈپٹی اسپیکر نا منت واری ءِ ہرفے۔ اوڈپٹی اسپیکر ءِ تحصیل میریان اٹی نادرا سینٹر نا جوڑ کننگ نابابت سرجم آتیان معلومدار کرسا پارے کہ میریان اٹی نادرا سینٹر نا جوڑکننگ نا منظوری مسنے و دا مسخت کن بلڈنگ ہم ہائیر کننگانے۔ اوڈپٹی اسپیکر ءِ تحصیل میریان اٹی بھاز زوت نادرا رجسٹریشن سینٹر اس جوڑ کننگ نا باوری کرفے۔ اوخیبرپختونخوا نا سویلی ضلع غاتیٹی الس ءِ شناختی کارڈ آتا دوئی کننگ و رجسٹریشن نا چرجوئی ٹی مون تروک ویل آتے اولیتی بنداو تیا ایسر کرفنگ نا ہم باوری کرفے۔
