اسلام آباد۔ 07 دسمبر (اے پی پی) بنجائی وزیر حوالکاری و شینکاری مریم اورنگزیب پارینے مذہب آ سیاست کننگ، شہید آتا برخلاف غلیظ ءُ مہم اس چلیفنگ و قومی فائدہ غاتے بہاکروک آ داسہ کشمیر آ سیاست کننگ اٹی ءِ، وزیراعظم آزاد کشمیر عمران خان نا ہُشکا تننگ آ منگلا ڈیم انا جوڑ جاڑ نا ڈٹ انا دود اٹی است ہسون ءُ حرکت اس کرے، عمران خان تینا ڈبنگوک آ سیاست نا خاطر آزاد کشمیر و پاکستان نا گچینی نا ڈٹ انا دود ءِ منفی رنگ اس تننگ نا گھٹیا و مذمت نا قابل چال اس چلیفے، سائفر نا منٹ آتے بدل کرسا قومی فائدہ غاتے نسخان تروک آ ’’کاریگر‘‘ آن پین انت توقع کننگ مریک؟۔ چارشنبےنادے آ عمران خان نا بیان آ ردعمل اٹی بنجائی وزیر حوالکاری پارے کہ توشہ خانہ ءِ پُلوک و گھڑی تے بہا کروک آ داسہ کشمیر نا پن آ تینا گندہ و بے شرم سیاست ءِ کننگ ءِ۔ کشمیر فروش وزیراعظم شہباز شریف ءِ پاپ کہ کشمیر نا ویل انا انت کروئی ءِ۔ اوپارے کہ کشمیر آ اسہ گھنٹہ اس تول بش کننگ و سڑک و چورنگی تا پن تے بدل کروک آ قومی مفاد آ گوازی اس کننگ ءِ۔ بنجائی وزیر حوالکاری پارے کہ افسوز! وزیراعظم آزاد کشمیر تینا منصب نا خیال ءِ تخا و نئے کشمیر نا ویل انا نزاکت نا پرواہ ءِ کرے، جندی، جماعتی و سیاسی فائدہ غاتیکن کشمیر نا ویل ءِ داوڑ کاریم اٹ اتنگ جوان اَلوکہ۔ اوبایدے خیال کروسس کہ او آزاد ریاست جموں وکشمیر نا وزیراعظم نا منصب آ ٹی ءِ، بنجائی وزیر مریم اورنگزیب پارے کہ وزیراعظم آزاد کشمیر رزاک اٹ وزیراعظم شہباز شریف نا تقریراٹی نیام تما، وزیراعظم شہباز شریف نرمی اٹ اودے دا پارسا کرے کہ نن تولنہ ہیت کینہ، وزیراعظم شہباز شریف اودے داہم پارے کہ ویل اس ارے تو او وزیراعظم آزاد کشمیر تون اواری اٹ اودے ایسر کیک۔ بنجائی وزیر حوالکاری پارے کہ وزیراعظم شہباز شریف ہرجہانی فورم آ کشمیر و کشمیری تا فائدہ غاتا پبی ترجمانی ءِ کرینے، اقوام متحدہ نا جنرل اسمبلی، شنگھائی کمکار تنظیم تون اوار ہر جہانی علاقائی فورم آ کشمیر نا ویل ءِ پورو واکداری اٹ تالان کرینے۔ اوپارے کہ کاش! وزیراعظم آزاد کشمیر دا جیرت نا درشانی ءِ تینا ’’کشمیر فروش قائد‘‘ نا مون آ کروسس۔ کشمیر فروش نانا لائقی ، نابودی و سازش نا سوب آن بھارت ءِ 5 اگست 2019 ء نا غیرکانودی گام ءِ ہرفنگ نا جیرت مس، کشمیر فروش مودی نا گچین کاری تیٹی سرسہبی کن دعا کرسا کرے۔ کشمیر فروش پاریکہ مودی نا دُوارہ گچین مننگ آ کشمیر نا ویل ایسر مریک۔ اوپارے کہ جموں وکشمیر نا جھیڑہ غا مچ آ پاکستان متحد و یک توار ءُ۔
