اسلام آباد۔ 07 دسمبر (اے پی پی) بنجائی وزیر قومی جان جوڑی عبدالقادر پٹیل پارینے جان جوڑی نا بشخ حکومت نا اولیت ءِ، مچ آ ملک اٹی کورونا دین انا تالانی ٹی کمتی بسنے، انٹرہیلتھ ریگولیشنز نا سلاہ و سوج آتیا عملدرآمد ءِ پک کننگ اُن، غٹ صوبائی حکومت آتیان خواست ءِ کہ کمکی گڑاتا کاریم اٹ اتنگ ءِ گچین و پک کیر۔ داخیال آتا درشانی ءِ او وزارت قومی جان جوڑی ٹی اڈ ہلوک آ دود آن تران کرسا کرے۔ دود اٹی یو ایس ایڈ نا کنڈآن طبی گڑاو آکسیجن سسٹم وزارت جان جوڑی نا دوٹی تننگا۔ داوخت آ عبدالقادر پٹیل پارے کہ چندی مرض آتا توننگ کن تروک آ گڑا، آکسیجن سسٹم و ڈیجیٹل ہیلتھ انا ڈٹ ستاکڑزک۔ جان جوڑی نا بشخ اٹی آکسیجن نا فراوانی نا نظام ءِ سوگو کننگ آکسیجن ایم آئی ایس نا تشکیل باییو میڈیکل ازباب آتا فراوانی کن است انا حب اٹ منت وار اُن۔ اوپارے کہ مچ آ ملک اٹی کورونا دین اٹی کمتی بسنے۔ بنجائی وزیر پارے کہ یو ایس ایڈ نا امداد آن مچ آ ملک انا 163 ہسپتال آتا بھاز نگہداشت نا بشخ آتیٹی آکسیجن نا فراوانی نا نظام اٹی گچینی بریک۔ کنا غٹ صوبائی حکومت آتیان خواست ءِ کہ او دا کمکی گڑاتا کاریم اٹ اتنگ ءِپک کیر۔ خصوصی وڑاٹ نوکاپ آن زہمی علاقہ غاتیٹی داڑان پبی فائدہ دوئی کننگے۔ نوکاپ آن زہمی علاقہ غاتیٹی ریلیف و بحالی کن امریکی حکومت نا خصوصی امداد ستاکڑزک۔ حکومت جان جوڑی نا بشخ اٹی گچینی کن دے و نن کوشست کننگ ءِ۔ اوپارے کہ جان جوڑی نا بشخ اٹی گچینی کن عملی و گچین گام گیج آتے پک کننگ اُن۔ جان جوڑی نا بشخ حکومت نا اولیت ءِ۔ عبدالقادر پٹیل پارے کہ انٹرہیلتھ ریگولیشنز نا سلا ہ و سوج آتیا عملدرآمد ءِ پک کننگ اُن۔ ناجوڑی تا ہچ ءُ سیم اس مفک۔ بارڈر ہیلتھ سروسز ءِ سوگو کننگ اُن۔ بارڈر آ ہیلتھ سروسز اخس کہ گچین و سوگو مریک تو ناجوڑی تیان رکھ مرینہ۔ اوپارے کہ ای اولیتی بنداو تیا بارڈر ہیلتھ سروسز ءِ سوگو کننگ کن پبی عملی گام گیج آتے پک کننگ اٹی اُٹ۔
