اسلام آباد۔ 07 دسمبر (اے پی پی) بنجائی وزیر قومی جان جوڑی عبدالقادر پٹیل ایم بی بی ایس اٹی نمان کارکڑد نشان تروک آ و 29 میڈل دوئی کروک آ طالب علم حافظ محمد ولید ءِ 2 لکھ انا چیک اس تسنے۔ داوخت آ میڈیا تون گپ وتران کرسا بنجائی وزیر پارے کہ حافظ محمد ولید میڈیکل نا تعلیم اٹی 29 میڈل دوئی کرینے، داوڑنا طالب علم ننا آخبت ءِ ہرافتے مچ آ ملک اٹی پہچان اس بایدے ملے۔ اوپارے کہ نن ولید نا است بڈی ءِ کرین تانکہ دا پین خواری کرسا میڈیکل نا بشخ انا چاہندار جوڑ مرسا مون آ برے۔ داوخت آ حافظ محمد ولید پارے کہ داکنکن شرفمندی نا ہیت اسے کہ بنجائی وزیر عبدالقادر پٹیل کنے بٹنگا و کنا عزت افزائی ءِ کرے۔ اوپارے کہ او پین خواری کرسا ملک وقوم انا خذمت ءِ کننگ خواہک۔ یات سلے کہ حافظ محمد ولید تینا میڈیکل نا تعلیم اٹی 29 میڈل دوئی کرسا اسہ ریکارڈ اس جوڑ کرینے ۔ حافظ محمد ولید 27 گولڈ میڈل و 2 سلور میڈل دوئی کرینے۔
