اقوام متحدہ۔ 07 دسمبر (اے پی پی) اقوام متحدہ نا جنرل اسمبلی پدتموک ملک آتا سیوت آ تالان گروپ جی 77 و چین نا کنڈآن پاکستان نا پیش کروک قرارداد ءِ منظور کرے، ہرانا رداٹ مچ آ دنیا ٹی ودوک آ قدرتی آفت و ایلو تنکی تیان زہمی بندغ آتابحالی ٹی کمک کن اقوام متحدہ نا انسانی حق انا نظام ءِ سوگوی تننگک۔ اقوام متحدہ ٹی پاکستان نا نائب آخبتی نمائندہ عامر خان دا قرارداد ءِ پیش کرے۔ اقوام متحدہ 193 باسکی جنرل اسمبلی قرارداد نا شڑت آتا رداٹ قدرتی آفت آتیٹی انسانی ہمدردی نا بنداو آ جہانی کمک و امداد تون اوار اوار ہلہلہ ئی گام گیج ، بحالی و پیش رفت نا نیام اٹ تعلق و مسہ ریسہ غاتیٹی آوار گدریفنگ ءِ پک کننگ نا گرج ءِ امنا کرے۔ جی 77 و چین اقوام متحدہ نا مون آ بروک آ ملک آتا غٹ آن بھلا بین الحکومتی ٹولی ءِ و پاکستان داوخت آ دا گروپ نا چیئرمین ءِ ہرانا باسک ملک آتا کچ داسہ 134 مسنے۔ پاکستانی مندوب عامر خان قدرتی آفت آتیان زہمی ملک و بندغ آتا کمک ءِ کننگ نا اہمیت آ زور شاغا۔ قرارداد نا منسودہ ٹی قدرتی آفت آتا اثرآتے کم کننگ کن پیشگی گام گیج آتا اہمیت ءِ مون آ تخسا دا ملک آتا خصوصی مالی گرج آتے امنا کننگانے ہرا انسانی ہلہلہ ئی حالیت، قدرتی آفت و چاگڑدی بدلی تا سوب آن ودی مروک آ خطرہ غاتون مون تننگ ءُ۔ پاکستانی مندوب داہیت آ زور شاغا کہ زہمی ملک آتیکن ہلہلہ ئی امداد ءِ مریس مدتی کمک نا دروشم اٹ پک کننگے۔ اینخو سال قرارداد نا متن اٹی اوار پوسکن آ تحریر نا بشخ انا مسخت انسانی ہمدردی نا بنداو آ امداد، توننگ، تیاری و بحالی نا کوشست آتے پین سوگوی تننگ ءِ تانکہ قدرتی آفت آتیان مروک آ جانی نسخان و نسخان تے کم آن کم کننگ مرے۔ اوقدرتی آفت آتا بابت قحط، غذائی بے رکھی و غذائی کاختی ءِ توننگ کن ودوک آ کوشست آتا کنڈآ اشارہ کرسا پارے کہ قرارداد اٹی انسانی ہمدردی نا گام گیج آتے پک کننگ و قدرتی آفت آتا انسانی اثرآتے کم کننگ کن گچین وڑوڈول اسے نا پیدواری ءِ کننگ نا کوشست آتا است بڈی ءِ کننگانے۔ دا مسودہ ٹی ذہنی جان جوڑی نا کمکاری نا خذمت آتے آفت آتا ردعمل و بحالی ٹی ہم اوار کننگانے۔ داوخت آ جنرل اسمبلی نا صدر ساباکوروسی پارے کہ اقوام متحدہ نا ہلہلہ ئی و انسانی امداد نا کمکاری ءِ سوگو کننگ نا بابت دیوان کن داکان زیات جوان وخت مننگ کپک انتئے کہ دنیا اینو آخبتی انسانی تنکی نا حالیت اٹی ءِ۔ اوپارے کہ نن غٹ غلط ریکارڈ آتے پرغنگ اُن۔
