بیجنگ۔ 07 دسمبر (اے پی پی) چین کابل اٹی پاکستانی سفارت خانہ غا جلہو نا ترندی اٹ مذمت ءِ کرسا پارینے کہ چین ہروڑنا بیدادی و دہشت گرد کارروائی تا سختی اٹ مخالفت ءِ کیک۔ جلہو اٹی اسہ سیکورٹی گارڈ اس بھاز ٹھپی مس۔ چینی وزارت خارجہ نا ترجمان ماؤننگ ہڑدے ئی بنداو آ مروک آ حوال اٹی چارشنبےنادے آ پاکستانی خبر رساں ایجنسی اے پی پی نا کنڈآن کروک آ اسہ سوج اسے نا ورندی ٹی پارے کہ چین تدوک آ ہفتہ کابل اٹی پاکستانی سفارت خانہ غا مروک آ جلہو نا ترندی اٹ مذمت و ہروڑنا بیدادی و دہشت گردی نا سختی اٹ مخالفت ءِ کیک۔ اوجلہو اٹی ٹھپی مروک آ بندغ کن ہمدردی نا درشانی ءِ کرے۔ ترجمان پارے کہ چین اوغانستان اٹی سیکورٹی حالیت آتیا سخت نظر تخانے۔ اوپارے کہ چین اوغانستان نا قومی سلامتی و سوگوی نا رکھ و ہروڑنا دہشت گردی و بیدادی تون مون تننگ کن اونا سوگو مخ تفی ءِ برجاتخک۔
