اسلام آباد۔6دسمبر (اے پی پی): مزن وزیر محمد شہبا ز شریف ءَ گشتگ کہ میڈیا کجام ہم ریاستءِ حاسیں پیلر اِت، حکومت صحافی آنی رکینگ ءِھاترءَ گامگیج کنگ ءَ اِنت، میڈیا ، سول سوسائٹی ءُ حکومت ءَ را صحافی آنی رکینگءِ ھاترءَ یکجاہ ہوار کار کنگی اِنت، پاکستان ءَ صحافی آنی رکینگءِھاترءَ المی کانود جوڑ کتگ، ارشد شریف ءِ کوش اپسوز ناکیں وئیل اِت کہ ایشی ءِ سرءَ کینیا ءِ صدرءَگوں وت گپ کتگءُ چیف جسٹس سپریم کورٹ ءَ را کمیشن جوڑ کنگءِ ھاترءَ نمدی نبشتہ کتگ۔ اے ھیالانی درشانی آئی ءَ سئے شمبے ءِ روچءَ جرنلسٹ سیفٹی فورم ءِ ردءَ اقوام متحدہ ءِ 10 سالی پلان آف ایکشن ءِ ہوالگءَ برجم داشتگیں مراگش ءَ حاسیں مہمان بوتگء ُترانے کتگ۔ اے موہ ءَ جرنلسٹ سیفٹی فورم ءِ چیئرمین وسینئر صحافی حامدمیرڈنمارکءِ سفیر جیکب لائنلف،ناروے ءِ سفیر پر البرٹ الساس ء ُ فرانس ءِ سفیر نیکولس گیلی ءَ تران کتگ۔ مراگش ءَ بازیں ملک آنی سفیر ء ُ سول سوسائٹی ءِ نمائندگاں ہوار سینئر صحافی ہم ساڑی بوتگ اَنت۔ مزن وزیر ءَ گشتگ کہ سپریم کورٹ ءِ چیف جسٹس ءَرا کمیشن جوڑ کنگءِ ھاترءَ نمدی ہم نبشہ کتگ۔ مزن وزیر ءَگشت کہ جمہوریت ء ُ میڈیا ءِ آزادی یکے دومی ءَگوں بندوک اَنت۔ پاکستان ءَ 33 سال ڈکٹیٹر شپ بوتگ بلے پاکستان جمہوری ملک اِتءُ دائمءَ بیت۔ آئیءَ گشتگ کہ 1973 ءِ آئن ءَ را سیاسی سروکانی تپاکی ءِ عکس لیک اِتگء ُ گشتگ کہ یکے دومی ءِ گوما کستءُ کینگءَ ابید ہم اے جوانیں مولء ُ مرادءِ ھاترءَ ذاتی دوستی ء ُ نادوستی ءَ رایک نیمگءَ ایر کتگء ُ سیاست داناں یک آئین ءِ سرءَ تپاک کتگ۔ 1973 ءِ آئین باز مقدس اِنت۔ آئی ءَ گشتگ کہ مئے حکومت بلوچستان ، خیبر پختونخوا ء ُپنجاپ ءَ صحافی آنی رکینگءِھاترءَ کانود جوڑ کنگءَرا من اِیت۔ آئیءَگشتگ کہ گوستگیں سال مزن گسءَ صحافی آنی رکینگ ءِ کانود تپاکی ءِ گوما منگ بوتگ۔ آئیءَگشتگ کہ ایشی ءِتہا سیکشن 6 ءِ گیشی ءِ جیڑہ ءِ چارءُ تپاسی کنگ بیت۔ آئیءَ گشتگ کہ لیکہ ءِ درشانی ءِ آزادی آئین ءَ داتگ ء ُ صحافی آنی رکینگ ء ُ سلامتی المی کنگ حکومت ءِ زمہ واری اِنت۔ مزن وزیرءَ یورپ ءَہوار دنیاءِ بازیں ملک آنی گوما بیپاری سیادی ءَرا گیش کنگءِ جزمءِ درشانی کتگء ُ گشتگ کہ پاکستان درائیں ملک آنی گوما جوانیں سیادی جو ڑ کنگءِوائشت مند اِنت چیا کہ ایشی ءَ ابید دیمروئی کنگ نابیت۔ آئیءَ اے اُمیتءِدرشانی کتگ کہ جرنلسٹ سیفٹی فورم صحافی آنی جیڑہ ء ُجنجالاں گیشءُگیوار کنگءِ ہوالگءَ حاسیں کرد پیلو کنت۔ اے ہوالگ ءَ بنجاہی حکومت ہرچ وڑیں بوھوکیں کمک کنت۔
