اسلام آباد۔6دسمبر (اے پی پی):سپریم کورٹ ءَ کلانہ ایں اھوالکار ارشد شریف ءِ کوش ءِ کیس ءِ درج کنگ ءِ حکم دیان ءَ گوشداری ءَ را باندات ءَ تاں مھتل کتگ۔ سئے شمبے ءَ چیف جسٹس عمر عطاء بندیال ءِ سروکی ءَ پنچ باسکی لارجر بینچ ءَ ارشد شیرف کوش ءِ کیس ءِ سر ءَ وت نوٹس زرتگ ایشی ءِ تہءَ جسٹس اعجازالاحسن، جسٹس جمال خان مندوخیل ، جسٹس مظاہرعلی اکبرنقوی ءُ جسٹس محمد علی مظہر ھوار انت۔ گوشداری ءِ رد ءَ ایڈیشل اٹارنی جنرل، سیکرٹری تہی کار ءُ ایندگر ٹوھیں کارندہ آمید گس ءَ پیش بوتگ انت گوشداری ءِ ساھت ءَ چیف جسٹس ءَ ایڈیشنل اٹارنی جنرل ءَ را دلگوش دیان ءَ گوشتگ کہ یک فیکٹ فائندنگ کمیٹی ءِ جوڑ بوتگ۔ ارشد شریف ءِ مات ءِ نمدی ءِ آیگ ءَ چہ پد کورٹ ایچ آر سیل پٹ ءُ پول کنگ ءَ انت۔ چیف جسٹس ءَ گوشت کہ وزارت ءِ تہی کار ءَ گوستگیں آدینگ ءِ روچ ءَ فیکٹ فائنڈنگ کمیٹی ءِ رپوٹ جم کنائینتگ ایش وزارت ءِ تہی کار ءَ انوگ ءَ تاں جم نہ کنائینتگ۔ ایڈیشنل اٹارنی جنرل ءَ گوشتکہ تاں وھد ءِ رپوٹ اتکگ وزیر ءِ تہی کار فیصل آباد ءَ بوتگ۔ رپوٹ ءَ لستیں ھاسیں چیز بوت کنت۔ وزیر ءِ تہی کار ءِ چارگ ءَ چہ پد رپوٹ سپریم کورٹ ءَ دیگ بیت۔ کل فیکٹ فائنڈنگ کمیٹی ءِ رپوٹ پیش کناں۔ چیف جسٹس ءَ گوشتگ کہ ارشد شریف نامداریں اھوالکارے بوتگ۔ آئی ءَ را چیا کوشگ بوتگ ءُ ڈن ملک ءَ پرچا۔۔؟ پاکستان ءِ کرا دراج بریں آسراتی است کہ ڈن ملک ءِ جیڈھ آنی پٹ ءُ پول ءَ کت بکناں، پاکستان ءَ را ڈن ملک ءَ تاں رسائی گون اِنت۔ چیف جسٹس عمر عطا ء بندیال ءَ گوشت کہ فیکٹ فائنڈنگ کمیٹی ءَ را واپس آیگءَ بازیں وھد بوتگ، حکومتی کمیٹی ءِ پکوئیں رپوٹ انوگ ءَ تاں سپریم کورٹ ءَ را پرچا نہ نہ رستگ ؟ سینئریں ڈاکٹر ءَ میڈیکل رپوٹ تیار کتگ بلے ایش دلبڈی نہ انت۔ ھمک بنی آدم ءِ جان ءِ پھریزگ ءُ دیمپانی کنگی انت، اھوالکار آنی گوما اچ رنگیں بدسلوکی سگ ءُ اوپار کنگ نہ بیت۔ چیف جسٹس ءَ گوشتگ کہ فیکٹ فائنڈنگ کمیٹی ءِ رپوٹ مرچی جم بکنائین ات تانکہ باندات ایشی ءِ سر ءَ گوشداری بہ بیت، 43 روچ ءَ چہ رپوٹ ءِ ودار ءَ کنگ ءَ آں، جیڈھ ءَ را پکو زورگ ءَ آں۔ ایشی ءَ پد آمید گس ءَ ارشد شریف ءِ کوش ءِ ایف آئی آر مرچی شپ ءَ تاں درج کنگ ءِ حکم دیانءَ گوشداری باندات چار شمبے ءَ 7 دسمبر ءَ تاں مھتل کنگ بوت۔
