سی پیک ڈٹ نئے بیرہ پاکستان اکن بلکن مچ آ ڈیہہ اکن گیم چینجر اس مریک، دا سٹریٹجک معاہدہ اس ہی آخا بلکن پاکستان و چین نا نیام اٹ دہائی تیا مبنی سنگتی نا بھرم ئِ
بیجنگ۔ 13مئی (اے پی پی) وزیراعظم محمد نواز شریف پارینے کہ پاکستان نا توانائی تنکی تون مون تننگ کن نیشنل انرجی ایڈمنسٹریشن (این ای اے) اسہ پت انا قابل و گچین شریدار اسے۔ چینی حکومت و چینی نیشنل انرجی ایڈمنسٹریشن نا بجلی ودی کننگ نا ڈٹ آتا کمک اٹ توانائی تنکی نا چٹفنگ اٹی پاکستان نا مدت کمکاری نا بڑزکو مثال اسے۔ او ہفتہ نا دے داڑے نیشنل انرجی ایڈمنسٹریشن نا کنڈآن اڈ ہلوک آ بھاشا پروجیکٹ کانفرنس آن تران کریکہ۔ داوخت آ وزیراعلیٰ پنجاب شہباز شریف ، وزیراعلیٰ سندھ سید مراد علی شاہ ، وزیراعلیٰ خیبر پختونخوا پرویز خٹک و وزیراعلیٰ بلوچستان نواب ثناءاللہ زہری آن بیدس بنجائی وزیر احسن اقبال، اسحاق ڈار، خواجہ سعد رفیق، انوشہ رحمان، خرم دستگیر و وزیراعظم نا سلاہکار خارجہ امور سرتاج عزیز ہم وزیراعظم تون اوار ئسر۔ وزیراعظم پارے کہ نیشنل انرجی ایڈمنسٹریشن نئے بیرہ پاکستان اٹی توانائی نا کاختی نا ویل اتون مون تننگ اٹی کمک فراوان کننگ ئِ بلکن دا پیچیدہ حالیت آن پیش تمنگ کن پاکستان نا توانائی نا بشخ آتا چاہندار تے تربیت ہم فراوان کننگ ئِ۔ اوپارے کہ نن چینی نیشنل انرجی ایڈمنسٹریشن نا آزموندہ غاتیان فائدہ ہرفنگ اُن۔ اوپارے کہ توانائی آ اسیجائی ورکنگ گروپ پاکستان نا توانائی نا بشخ انا شونداری کن ٹھوس بنداو اس تخانے۔ اوپارے کہ نیشنل انرجی ایڈمنسٹریشن چین پاکستان اقتصادی راہداری ڈٹ انا رداٹ بھلاتوانائی نا ڈٹ آتا متمنی ئِ۔ وزیراعظم پارے کہ داوخت آن فائدہ ہرفسا بروک آ سال انا نیم اسکان توانائی نا کاختی نا چٹفنگ کن ننا کوشست آتا اسہ اہم ئُ عنصر اس ارلی ہارویسٹ پروجیکٹ آ ترندی اٹ عملدرآمد مریک۔ اوساڑی مروک آتے پارے کہ 300 میگاواٹ نا شمسی توانائی نا ڈٹ و 50 میگاواٹ نا اِرا ونڈ پاور ڈٹ بجلی نا پیداوار نا بنائِ کرینو ، ساہیوال کول پاور پروجیکٹ نا 660 میگاواٹ نا اولیکو یونٹ جون اٹی تینا پیداوار نا بنائِ کیک، پورٹ قاسم کول پروجیکٹ نا اولیکو یونٹ اینخو سال نومبر اٹی کاریم نا بنائِ کیک۔ وزیراعظم پارے کہ داڑتون اوار اوار بجلی نا پیداوار و ٹرانسمیشن نا چندی ڈٹ آتیا عملدرآمد ہم ترندی اٹ برجائِ۔ او چینی صدر نا ون بیلٹ ون روڈ انا تصور نا حوالہ ئِ ترسا پارے کہ سی پیک ڈٹ نئے بیرہ پاکستان کن بلکن مچ آ ڈیہہ کن گیم چینجر اس مریک ، داڑآن راجی، اقتصادی شونداری، ڈیہہ و اوڑآن پیشن نیزگاری نا چٹفنگ ، امن و شونہالی نا مون آ دننگ اٹی کمک رسینگک۔ وزیراعظم نواز شریف پارے کہ سی پیک بیرہ اسہ سٹریٹجک معاہدہ اس آخا بلکن دا پاکستان و چین نا نیام اٹ دہائی تیا مبنی سنگتی نا بھرم ئِ۔ اوپارے کہ دا ڈٹ انا سرسہبی نا اندازہ داہیت آن خلنگ مریک کہ بھلو کچ اسے ٹی ملک آک دا ڈٹ اٹی اوار مننگ آ رضا مندی نا درشانی ئِ کرینو۔ وزیراعظم پارے کہ اقتصادی شونداری و مریس وختی شونہالی کن پاکستان ئِ نئے بیرہ توانائی نا بشخ اٹی کمک نا گرج ئِ بلکن دانا دیر ئِ کوڑی کننگ نا کچ ئِ گچین جوڑ کننگ کن بھلا گام گیج آتا گرج ئِ ، دا رداٹ ننا حکومت نا چکار دا علاقہ ٹی دیر آن زیات آن زیات فائدہ ہرفنگ آٹی ئِ و بھاشا ڈیم انا جوڑ جاڑ دا رداٹ اسہ بے کچ اہمیت نا حامل گام اسے۔ کانفرنس اٹی چین نا توانائی نا بشخ انا کمپنی تا نمائندہ و سروک آک ڈیم ڈٹ انا بابت تینا سٹڈی آن معلومدار کریر۔ اوکان پد وزیراعظم سی پیک نا رداٹ توانائی نا ڈٹ آتیا معاہدہ غاتیٹی ہم شرکت کرے ہرافتیا سیکرٹری ڈٹ بندی و شونداری یوسف نسیم کھوکھر و پاکستان اٹی چین نا سفیر سن وی ڈونگ دسخط کریر۔
