اسلام آباد۔ 06 دسمبر (اے پی پی) پاکستان بھارتی حکومت آن تاریخی بابری مسیت ءِ اونا اصل جاگہ غا دُوارہ تفنگ و اونا بھسکاری نا زموار ڈوہدار تے سزا تننگ نا خواست کرینے۔ دفترخارجہ نا ترجمان ہندو انتہاپسندآتا دوتے اٹ تاریخی بابری مسیت نا شہادت نا 30 سال پورو مننگ نا وخت آ سے شنبےنادے آ اسہ بیان اسے ٹی بابری مسیت نا جاگہ غا ہندو مندر نابرجا تفنگ نا مذمت ءِ کرے۔ بھارت اٹی ودوک آ اسلاموفوبیا و خار تس ڈوہ انا نوٹس ءِ ہلنگ نا گرج آ زور شاغسا پاکستان جہانی برادری ، اقوام متحدہ و تعلقدار جہانی ادارہ غاتیان خواست کرے کہ او انتہاپسند ’’ہندوتوا‘‘ حکومت آن بھارت اٹی اسلامی میرات آتا ہند آتا رکھ اکن تینا کڑد ءِ ادا کیر۔ بیان اٹی پاننگانے کہ اینو بھارت نا شار ایودھیا ٹی ہندو انتہاپسند آتا دوتے اٹ تاریخی بابری مسیت نا انہدام نا 30 می برسی ءِ، دا وخت ابھارت اٹی ہمووخت آن ودوک آ مسلم مخالف گنوکی نا اسہ است ہسون یات دہانی اسے۔ ترجمان پارے کہ نن بابری مسیت نا بھسکاری نا زموار ڈوہدار تا بریت نا مذمت ءِ کینہ۔ ترجمان تینا بیان اٹی پارے کہ بھارت اٹی ہندو بالادست گروہ ارانسی نا گیانواپی مسیت تون اوار گڑاس پین مسیت آتے مندر آتیٹی بدل کننگ نا خواست کننگ ءِ ، داخواست آتیان بابری مسیت کون آ پین واقعہ مننگ کیک۔ ترجمان پارے کہ بھارتی مسلمان تا مذہبی آجوئی تیا پدریسہ جلہو مننگ ءِ، بھارت اٹی حکمران جماعت پدریسہ مسلمان تا برخلاف جوزہ غاتے ہشکا ترسا خار ءِ تہو تننگ ءِ۔ اوپارے کہ دُن کہ اسلامی کمکار تنظیم(او آئی سی) تینا چندی پڑوتا کمک اٹ خواست کرینے، نن بھارتی حکومت آن خواست کینہ کہ بابری مسیت ءِ اونا اصل جاگہ غا دُوارہ تفنگے و اونا بھسکاری نا زموار ڈوہدار آتے سزا تننگے۔ ترجمان تینا بیان اٹی مستی پارے کہ جہانی برادری ءِ بھارت اٹی ودوک آ اسلاموفوبیا ، خارتس تقریر، و خارتس ڈوہ تا نوٹس ہلنگ نا گرج ءِ۔ نن جہانی برادری، اقوام متحدہ و تعلقدار جہانی ادارہ غاتیان خواست کینہ کہ او انتہاپسند’’ہندو توا‘‘ حکومت آن بھارت اٹی اسلامی میرات آتا ہند آتا رکھ اکن تینا کڑد ءِ ادا کیر۔ اوپارے کہ بھارتی حکومت اقلیت خاص وڑاٹ مسلمان و اوفتا عبادت گاہ تا رکھ ءِ پک کے۔
