حکومت الس ءِ اڑزان بجلی نا فراوانی کن گام گیج کننگ اٹی ءِ، وزیراعظم شہباز شریف نا منگلاٹی تران

منگلا۔ 05 دسمبر (اے پی پی) وزیراعظم محمد شہباز شریف پارینے کہ حکومت الس ءِ اڑزان بجلی نا فراوانی کن گام گیج کننگ اٹی ءِ  انتئے کہ پاکستان کبین توانائی ءِ سگنگ کپک، سنگت ملک آتا کمکاری آ اوفتا منت واراُن، منگلا ڈیم انا ڈت پاک امریکہ تعلقداری تا گچین ءُ درور اسے ، دا واپار و زرکاری ءِ مون آ دننگ نا گچین ءُ وخت اسے ، ملک اٹی شونداری و شونہالی نعرہ ودھرناغاتیٹی آخا سیاسی سوگوی آن بریک، حالیت آک ہنداخہ مشکل ءُ کہ اگہ پاو تو جون سیم سیم مریک، مخلوط حکومت ملک ءِ مون تروک مشکل آ چیلنج آتون مون تننگ کن پورو تندہی اٹ کاریم کننگ اٹی ءِ۔ داخیال آتا درشانی ءِ او دوشنبےنادے آ منگلا ڈیم انا یونٹ 5 و 6 انا ریفربشمنٹ نا بنائی دود آن تران کرسا کرے۔ وزیراعظم پارے کہ منگلا ڈیم انا ڈٹ پاک امریکہ تعلقداری تا گچین ءُ درور اسے، دانا بنداو ءِ صدر ایوب نا دور اٹی تخنگاسس۔ اوپارے کہ حکومت الس ءِ کلین، گرین و اڑزان بجلی نا فراوانی کن کوشست کننگ ءِ دا ڈیم انا ننا زرگزرانی شونداری ٹی بھا زاہم ءُ کڑ داسے ، دانا جوڑ جاڑ، اپ گریڈیشن و ریفربشمنٹ نا گرج ئسک ہراڑکن یو ایس ایڈ 150 ملین ڈالر تس و فرانس 90 ملین یورو نا وام فراوان کرے وخت اس کہ 65 ملین یورو پین فراوان کننگ نا ہم قول کرینے، دا 483 ملین ڈالر نا ڈت اسے ہرا شریداری نا گچین ءُ درشانی اسے۔ وزیراعظم تربیلا ڈیم اکن کمکاری نا پڑو آ ہم امریکی حکومت و الس نا منت واری ءِ ہرفے و پارے کہ پاک امریکہ تعلقداری تا دنگ واپار و زرکاری تون اوار چندی بشخ آتیٹی ودفنگ نا دا گچین ءُ وخت اسے۔ اوجنرل الیکٹرک ہائیڈرو فرانس نا ہم منت واری ءِ ہرفے و پارے کہ ایل این پاور پروجیکٹ آتا بابت ہم اوفتا اہم کڑد مسنے۔ وزیراعظم پارے کہ داڈٹ انا بناءِ کننگ کنکن گمر نا سوب ءِ ، اڑزان بجلی پاکستان نا گرج ءِ وحکومت دا چرجوئی ٹی ہرممکن گام گیج کننگ ءِ۔ وزیراعظم پارے کہ واپڈا ہم دا ڈٹ آ 175 ملین ڈالر نا بھلو زراس خڑچ کرینے ہراڑا واپڈا کمامدارآک ستاکڑزرہ۔ اوپارے کہ پاکستان اینو مشکل آ چیلنج آتون مون تننگ ءِ، مخلوط حکومت پورو تندہی و لگن اٹ ملک ءِ مون تروک مشکل چیلنج آتا مقابلہ ءِ کننگ ءِ، منہ دے مست اسہ ارب ڈالر نا بانڈا نا بابت وڑوڑنا تران کننگاکہ، نن اونا زرتس نا بست وبندءِ کرینن۔ وزیراعظم پارے کہ منگلا ڈیم انا تفنگ نا کارنامہ تاریخ نا ورق آتیٹی زندہ سلک، ہندا وڑ جمہوری حکومت آک ہم ہرا جوان انگا کاریم تے کریر اوہم اوفتا کریڈٹ آ مدام سلرہ، 2013ٹی مسلم لیگ (ن) حکومت ءِ سنبھالا تو لوڈشیڈنگ عروج آ ئسک، نواز شریف لوڈشیڈنگ ءِ چٹفے ہراڑان صنعت آ ک چلینگ نا بناءِ کریر و کھیت کھلیان خرن خرن مسر، برآمد آتا بحال مننگ بناکرے، پاکستان پیپلزپارٹی سٹیل مل انا بنداو ءِ تخا و پورو کرے، اونا دا کارنامہ تاریخ اٹی مدام یات تخنگک۔ وزیراعظم پارے کہ پاکستان نا انرجی بل 27 ارب ڈالر سالانہ اسکان سرمسنے، اسہ ہم پدتموک ءُ ملک اس دادے سگنگ کپک، اللہ تعالیٰ پاکستان ءِ بے تحاشا وسیلہ غاتیان شپ کرینے، بدبختی اٹ نن تینا وسیلہ غاتیان فائدہ ہرفنگ کتون و ہائیڈل آن بیرہ 10 ہزار میگاواٹ بجلی جوڑ کننگ نا لائخی تخنہ وخت اس کہ دا لائخی داکان بھاز زیات ءِ۔ وزیراعظم پارے کہ دانازمواری غٹ حکومت آتیا مریک اگہ ملک اٹی ڈیم و آبی کوڑی تفنگاکہ تو ہرا بھسکاری ساڑی آ نوکاپ آن مس او متوکہ و اڑزان پن بجلی نا سوب آن پاکستان شونداری نا کنڈا ہناکہ۔ دود آن جنرل الیکٹرک ہائیڈرو فرانس نا پروجیکٹ ڈائریکٹر ہم تران کرے۔ داوخت آ وزیراعظم نا خصوصی کمکار طارق فاطمی ، یوایس ایڈ نا سروک و وزیراعظم آزاد کشمیر ئسک ہم ساڑی ئسر۔