اسلام آباد۔ 02 دسمبر (اے پی پی) چیئرمین سینیٹ محمد صادق سنجرانی متحدہ عرب امارات نا قومی دے انا وخت آ متحدہ عرب امارات نا سرکڑدہ و الس ءِ پاکستان نا پارلیمان ، حکومت و الس نا کنڈآن است اناحب اٹ مبارکبادی تسنے۔ چیئرمین سینیٹ پارے کہ متحدہ عرب امارات نا سیاسی سرکڑدہ غاک شونداری و شونہالی نا ہرا مزل آتے طے کرینو او ستاکڑزنگ نا قابل ءُ۔ پاکستان متحدہ عرب امارات نا الس نا خوشی تیٹی بریبر نا شریک اُن۔ اوپارے کہ ڈیہہ نا شونداری، زرگزرانی شونہالی و امن نا مون آ دننگ ننا اسیجائی ویژن ءِ۔ پاکستان و متحدہ عرب امارات نا نیام اٹ برادرانہ تعلقداری کثیر الجہتی کمکاری تیا تالان ءُ۔ ایلمی و پت انا رشتہ اسیجائی مذہبی و دودوربیدگی رابطہ غاتا سوب آن پین سوگو مسنے۔ چیئرمین سینیٹ پارے کہ جہانی فورم تیا بے مٹ کمکاری پاکستان و متحدہ عرب امارات نا نیام اٹ پت و شرف ءِ پاش کیک۔ ننے دا تعلقداری و ایلمی نا فضاء ءِ پین سوگوی تننگ کن بڑزکو کہول آ ڈل آتا ہن و بر اٹی ترندی اتنگ و واپاری سرجزآتے پین مون آ دننگ آ چکار کروئی مریک۔ محمد صادق سنجرانی پارے کہ زرکاری و کاروباری ہن و بر نا کمک اٹ ہڑتوم آ کنڈآتا الس ءِ پین خڑک اتنگ مریک۔ پاکستان و متحدہ عرب امارات نا سنگتی وخت انا ہر امتحان آ پورو سلیسنو۔ چیئرمین سینیٹ پارے کہ او متحدہ عرب امارات و پاکستان کن پوسکن آ سرسہبی و شونداری کن دعا کیک۔ پاکستان۔متحدہ عرب امارات سنگتی زندہ باد۔ ڈپٹی چیئرمین سینیٹ مرزا محمد آفریدی متحدہ عرب امارات نا قومی دے انا وخت آ مبارکبادی تس وپارے کہ پاکستان و متحدہ عرب امارات نا تعلقداری سوگو تاریخی ، دودوربیدگی ، مذہبی و اقتصادی بنداوتیا استوار ءُ۔ ڈپٹی چیئرمین سینیٹ پارے کہ او پُراومیت ءِ کہ ہڑتوم آ ملک آتا نیام اٹ ہڑتوم آ کنڈآتا تعلقداری ہرہنوک آ دے اتون پین سوگو مریک۔

متعلقہ مضامینمصنف کی طرف سے مزید