اسلام آباد۔ 02 دسمبر (اے پی پی) بنجائی وزیر تعلیم و کسبی تربیت رانا تنویر حسین پارینے کہ یو ایس ایڈ نا ہائر ایجوکیشن سسٹم سٹرینتھننگ ایکٹیویٹی (ایچ ای ایس ایس اے) نا رداٹ ننا 16 یونیورسٹی تے مارکیٹ ڈیلیور کننگ اٹ اوفتا ادارہ جاتی و تکنیکی لائخی تے گچین کننگ کن تعلقدار تعلیم و پٹ وپول اٹی کمک فراوان کننگک۔ داخیال آتا درشانی ءِ او جمعہ نادے آ یو ایس ایڈ و ہائیر ایجوکیشن کمیشن نا کنڈآن اسلام آباد اٹی ’’21 می صدی ٹی بڑزکو تعلیم و افرادی قوت نا شونداری آ جہانی سروکی دیوان‘‘ نا ایسری سیشن آن تران کرسا کرے۔ اوپارے کہ یو ایس ایڈ نا ہائر ایجوکیشن سسٹم سٹرینتھننگ ایکٹیویٹی (ایچ ای ایس ایس اے) نا رداٹ، ہرانا مالیت 19 ملین ڈالر ءِ، ننا 16 یونیورسٹی ٹے مارکیٹ ڈیلیور کننگ اٹ اوفتا ادارہ جاتی و تکنیکی لائخی تے گچین کننگ کن تعلقدار تعلیم و پٹ وپول اٹی کمک فراوان کننگک۔ رانا تنویر حسین پارے کہ نن ادارہ جاتی نظم و نسق ، نصاب ، رسینگ و آب، تدریسی و پٹ وپولی وڑوڈول، صںوعت و تدریس نا رابطہ و موسمیاتی بدلی نا موافقت آ چکار تخن۔ اوپارے کہ دااسہ حقیقت اسے ، چائے نن اودے وڑن یا وڑپن، زیات تر اسٹیک ہولڈر آتے غاو ءِ کہ ننا تعلیمی نظام طالب علم آتے ترندی اٹ بدل مروک دنیا کن المی علم، آزموندہ، مہارت یا قدر آن آراستہ کپک۔ بنجائی وزیر پارے کہ دا غٹ آ پیدوار ءِ کہ معمول نا رداٹ کاروبار دا رجحان ءِ بدل کننگ نا آپشن اف۔ تینا تران نا ایسر اٹ رانا تنویر ایچ ای ایس ایس اے پروجیکٹ ٹیم نا منت واری ءِ ہرفے کہ او سجفوک آ راہشون، پالیسی ساز، تعلیم نا چاہندار، و طالب علم آتا اسہ بھاز سرسہب ٹولی اسے دا ویل آتیا سجفنگ کن یکجا کرے ہراننا گریجویٹ آتا ملازمت و افرادی قوت نا شونداری ءِ گچین کننگ کن دمدستی و اہم ءِ۔ داوخت آ بنجائی وزیر بڑزکو تعلیمی نظام نا بنداوی پنجر نا شونداری و ادارہ جاتی لائخی نا تعمیر نا پدریسہ مخ تفی آ امریکی حکومت و یو ایس ایڈ نا منت واری ءِ ہرفے۔
