پاکستان ون بیلٹ ون روڈ ڈٹ انا پبی مخ تفی ئِ کیک
بیجنگ۔ 13مئی (اے پی پی) وزیراعظم محمد نواز شریف پارینے کہ پاکستان چین نا ون بیلٹ ون روڈ (اوبی او آر) ڈٹ انا پبی مخ تفی ئِ کیک، ڈیہہ نا سوگوی کن دا ڈٹ انا پوروی ٹی تینا پبی کڑد ئِ ادا کننگ کن چین اتون اواری اٹ کاریم کینہ۔ ہفتہ نا دے بیجنگ نا عظیم السی ہال اٹی وزیراعظم محمد نواز شریف چین نا وزیراعظم لی کی کیان تون اوڑدہی کرے، اوڑدہی ٹی سویلی ایشیانا ڈیہہ و جہانی کہول آ پائیدار اقتصادی شونداری نا بابت چندی ڈیہہ تا رابطہ و واپار اٹی مون آ دننگ آ خیال آتا درشانی ئِ کننگا۔ اوڑدہی ٹی کڑدہ غاک چین پاکستان اقتصادی راہداری (سی پیک) آ کاریم نا رفتار نا جاچ ئِ ہلکر ہرا چین نا صدر ژی جن پنگ نا ون بیلٹ ون روڈ نظریہ نا اہم و بنداوی ئُ بشخ اسے۔ وزیراعظم محمد نواز شریف چین نا وزیراعظم ئِ اوبی او آر فورم نا میزبانی آ مبارکبادی پیش کرے و پارے کہ پاکستان دا ڈٹ انا پورو مخ تفی ئِ کیک۔ اوخصوصاََ پارے کہ چین نا دورہ کن ڈل انا جوڑ کننگ اٹی ہرچار آ صوبہ غاتا وزیراعلیٰ تا شرکت ئِ المی جوڑ کننگانے ہرا چین پاکستان سنگتی نا نشانی اسے۔ اوپارے کہ پاکستان دا ہیت آ باورتخک کہ چین ڈیہہ نا امن و سوگوی کن تزویراتی پالیسی تخک۔ وزیراعظم پارے کہ پاکستان سی پیک ڈٹ آ چین نا بے کچ منت وار ئِ۔ سی پیک ڈیہہ نا شونداری و سوگوی کن بھاز زیات وارخواہی فراوان کیک۔ اوڑدہی ٹی وزیراعلیٰ پنجاب شہباز شریف، وزیراعلیٰ سندھ مراد علی شاہ ، وزیراعلیٰ خیبر پختونخوا پرویز خٹک ، وزیراعلیٰ بلوچستان نواب ثناءاللہ زہری، وزیر خزانہ اسحاق ڈار ، وزیر واپار خرم دستگیر و ڈٹ بندی و شونداری نا بنجائی وزیر احسن اقبال ، انفارمیشن ٹیکنالوجی نا وزیر مملکت انوشہ رحمان و امور خارجہ نا بارواٹی وزیراعظم نا سلاہکار سرتاج عزیز تون اوار ایلو بڑزکو کمامدارآک ہم ساڑی ئسر۔
