حکومت اقتصادی راہداری ڈٹ آ گچین عملدرآمد کن غٹ ممکنہ گام گیج کننگ ئِ
بیجنگ۔ 13مئی (اے پی پی) وزیراعظم محمد نواز شریف پارینے کہ اونا حکومت چین پاکستان اقتصادی راہداری (سی پیک) ڈٹ آ گچین عملدرآمد کن غٹ ممکنہ گام گیج کننگ ئِ۔ حکومت توانائی و بنداوی ڈھانچہ نا بشخ آتیٹی شونداری ڈٹ آتیا عملدرآمد اٹی گچین سرسہبی دوئی کرینے۔ اوداخیال آتا درشانی ئِ چین نا عظیم السی ہال اٹی چین نا صدر ژی جن پنگ تون ہفتہ نا دے اوڑدہی ٹی کرے۔ وزیراعظم محمد نواز شریف داوخت آ پارے کہ سی پیک ڈٹ چین انا صدر نا ون بیلٹ ون روڈ وژن نا اہم ئُ عنصر اسے۔ اوپارے کہ نن سی پیک ڈٹ آتا بابت آن چین نا سروک نا عزم انا ستائِ کینہ۔ وزیراعظم بیلٹ اینڈروڈ فورم جہانی شونداری ٹی شرکت کن بیجنگ اٹی ئِ۔ چینی حکومت نا کنڈآن 14و 15مئی آ اڈہلوک آ فورم اٹی دنیا نا چندی ملک آتا 29 سروک مملکت و حکومت شرکت کننگ ئُ۔ وخت اس کہ 130 ایلو ملک آتا بڑزکو کہول انا ڈل ہم فورم اٹی شرکت کیک۔ عظیم السی ہال اٹی سرمننگ آ چین نا صدر وزیراعظم ئِ بخیر کرے۔ داوخت آ ہڑتوم آ راہشونک گرم جوشی اٹ جوڑ بڑ کریر۔ اوڑدہی ٹی وزیراعظم تون اوار پنجاب نا وزیر اعلیٰ شہباز شریف ، وزیراعلیٰ سندھ مراد علی شاہ ، وزیراعلیٰ خیبر پختونخوا پرویز خٹک ، وزیراعلیٰ بلوچستان نواب ثناءاللہ زہری تون اوار وزیر خزانہ اسحاق ڈار ، ڈٹ بندی و شونداری نا بنجائی وزیر احسن اقبال ، ریلوے نا بنجائی وزیر خواجہ سعد رفیق ، انفارمیشن ٹیکنالوجی نا وزیر مملکت انوشہ رحمان و امور خارجہ نا بارواٹی وزیراعظم نا سلاہکار سرتاج عزیز تون اوار ایلو بڑزکو کمامدارآک ہم ساڑی ئسر۔ وخت اس کہ چینی صدر تون اوار اونا بڑزکو کہول انا 9 باسکی ڈل ہم اوڑدہی ٹی ساڑی ئسر۔ وزیراعظم چینی صدر تون اوڑدہی آن زرس مست تینا چینی ہم منصب لی کیان تون اوڑدہی کرے و گوادر اٹی مخصوص اقتصادی زون نا اڈتننگ تون اوار ایلو شونداری ڈٹ آتیا زوت عملدرآمد نا گرج آ زور شاغا ۔ وزیراعظم محمد نواز شریف پارے کہ اونا ڈل اٹی اوار بڑزکو کہول نا باسک آک پاک چین سنگتی نا سوگو تعلقداری نا عکاسی ئِ کیرہ۔ اوپارے کہ پاکستان چینی صدر نا ون بیلٹ ون روڈ وژن نا مون آ دننگ کن چین تون ہم کوپہ سلوک ئِ۔ وزیراعظم صدر ژی جن پنگ ئِ بیلٹ اینڈ روڈ فورم نا سرسہب اڈتننگ آ مبارکبادی تس و پارے کہ چینی دارالحکومت اٹی مچ آ دنیا نا راہشون تا بھلو کچ اسے ٹی ساڑی مننگ چین نا سروکی آ جہانی برادری نا ودوک آ پت انا عکاسی ئِ کیک۔ وزیراعظم پارے کہ پاک چین سنگتی ئِ پاکستان اٹی بھلو کچ اسے آ السی پذیرائی دوئی ئِ۔ اوتین پہ تینی سنگتی نا مون آ دننگ کن کوشست آتے پین ترند کننگ نا گرج آ زورشاغا۔ اوڑدہی ٹی صدر ژی جن پنگ کانفرنس اٹی شرکت کننگ آ وزیراعظم و اونا ڈل انا خیرمقدم ئِ کرے۔ اوہڑتوم آ کنڈآتا تعلقداری نا مون آ دننگ و ڈیہہ نا شونداری نا بابت کروک آ اسیجائی کوشست آتیا پت انا درشانی ئِ کرے و پارے کہ داڑآن ہڑتوم آ سنگت ملک آتا تین پہ تینی رابطہ غاک پین سوگو مریرہ۔ اوپارے کہ سی پیک و علاقائی رابطہ غاتیٹی ودکی نا ایلو ڈٹ آتیان بیدس پاکستان و چین نا ہڑتوم آ کنڈآتا تعلقداری ٹی ودکی نا گیشتر وارخواہی ساڑی ارے۔
