چین کشمیر نا ویل انا بارواٹی پاکستان نا موقف نا مخ تفی ئِ کیک، چین مذاکرات نا کمک اٹ دا ویل انا پرامن ایسری اس خوائک
بیجنگ۔ 13مئی (اے پی پی) وزیراعظم محمد نواز شریف پارینے کہ چین کشمیر نا ویل انا بارواٹی پاکستان نا موقف نا مخ تفی ئِ کیک و دا ویل انا مذاکرات نا کمک اٹ پرامن ایسری اس خوائک۔ چین نا کمپنیک پاکستان اٹی توانائی و بنداوی ڈھانچہ نا بشخ آتیٹی بھلو کچ اسے آ زرکاری کننگ ئُ، پاکستان ئِ چین اتون تینا سنگتی آ فخر ئِ ۔ ہفتہ نا دے تینا چینی ہم منصب لی کیان تون عظیم السی ہال اٹی اوڑدہی آن پد صحافی تتون ہیت وگپ کرسا اوپارے کہ چین کشمیر نا ویل آ ہمیشہ پاکستان نا موقف نا پبی مخ تفی ئِ کرینے و آخبت اٹی ہم دا عمل ئِ برجاتخنگ نا باوری ترفینے۔ وزیراعظم پارے کہ پاکستان و چین ہڑتوم آ ک بھارت تون مذاکرات نا خواہش مند ئُ تانکہ کشمیر نا دیرینہ ایسر نا چاری ویل ئِ چٹفنگ مرے۔ وزیراعظم جمعہ نا دے چین نا دارالحکومت آ سرمس ہراڑے او ”ون بیلٹ ون روڈ فورم“ (اوبی او آر) اٹی شرکت کیک۔ اوپارے کہ چین پاکستان اقتصادی راہداری ڈٹ(سی پیک) نا دنگ ئِ ودفنگانے و داٹی چین نا کنڈآن کروک آ زرکاری 46ارب ڈالر آن 56ارب ڈالر اسکان ودانے۔ داخہ بھلو زرکاری اسے نا پاکستان نا تاریخ اٹی مثال ملیپک ہرانا مسخت الس نا شونداری و شونہالی ئِ۔ وزیراعظم داہیت انا خصوصی ذکر ئِ کرے کہ چین نا کمپنیک پاکستان اٹی توانائی و بنداوی ڈھانچہ نا بشخ آتیٹی بھلو کچ اسے آ زرکاری کننگ ئُ ۔ ہراڑآن ہندی خلقت کن روزگار نا فراوانی نا مثالی وارخواہی ودی مسنے۔ وزیراعظم پارے کہ چین نا کنڈآن کروک آ بھلازرکاری آن اقتصادی سرجز آتیٹی نمان ودکی مسنے۔ ہرانا نتیجہ ٹی لس بندغ نا زند آ مثبت زئم تمانے۔ وزیراعظم پارے کہ اونا دورہ چین پاکستان نا اقتصادی حالیت آتا مناسبت آن بے کچ اہمیت تخک و پاکستان چین اتون تینا سنگتی آ فخر کیک۔ کانفرنس اٹی بلوچستان نا وزیراعلیٰ نواب ثناءاللہ زہری نا شرکت نا حوالہ ئِ ترسا وزیراعظم پارے کہ صوبہ غا اقتصادی شونداری نا مثبت نتیجہ مرتب مننگ ئِ و سی پیک نا رداٹ بلوچستان اٹی کیہی بھلا ڈٹ آتے ترندی اٹ پورو کننگ انگ ئِ۔
