اسلام آباد۔ 18 نومبر (اے پی پی) وزیر مملکت خزانہ ڈاکٹر عائشہ غوث پاشا پارینے کہ جہانی بینک انا کساس نا رداٹ ساڑی آ نوکاپ آن ملک اٹی نیزگاری نا کچ اٹی ودکی مسنے۔ جمعہ نادے آ قومی اسمبلی ٹی وقفہ سوج آتے ٹی شیخ فیاض الدین و ایلو باسک آتا سوج آ وزیر مملکت ڈاکٹر عائشہ غوث پاشا پارے کہ نوکاپ آن ملکی ویل آتیٹی ودکی مسنے۔ جہانی بینک کساس ءِ خلکنے کہ نوکاپ نا سوب آن 90 لکھ مخلوق نیزگاری نا لکیر آن شیف ہنانو۔ ہندا وڑ بیروزگاری نا کچ اٹی ہم ودکی مسنے۔ اوپارے کہ دا بابت حکومت گام گیج کننگ اٹی ءِ، این ڈی ایم اے تون اواری اٹ ریکوری نا کاریم مننگ ءِ، اوپارے کہ افراط زر اہم باندات اسے، اوٹی درآمدی کبینی نا بھلو دُواسے۔ ہندا وڑ ڈالر نا قدر ودنگ آن ہم کبینی ٹی ودکی مسنے۔ مولانا عبدالاکبر چترالی نا ضمنی سوج آ وزیر مملکت پارے کہ ایل سیز نا ملنگ و ڈالر نا قدر اٹی پاننگوک وڑاٹ بینک اوار ئسک۔ اسٹیٹ بینک آف پاکستان دا بابت جاست وپاست کننگ ءِ ہرکس کہ اوار مریک اونا برخلاف کارروائی مریک۔ شیخ فیاض الدین نا ضمنی سوج آ اوپارے کہ افراط زر اٹی کمتی بیشی مریک۔ بینک ریٹ انا تعین ءِ مانیٹری پالیسی کمیٹی کیک اوٹی حکومت نا کڑد اف۔ اسٹیٹ بینک اسہ وتواجہ ءُ ادارہ اسے۔ شگفتہ جمالی نا سوج آ وزیر مملکت پارے کہ فرسٹ ویمن بینک اٹی بڑزکو عہدہ غاتیا تقرری میرٹ آ مریک۔ داسکان پوسکن آ ریکروٹمنٹ متنے۔ مولانا عبدالاکبر چترالی نا ضمنی سوج آ وزیر مملکت پارے کہ بینک انا مالی حالیت جوان اَلوکہ ہنداخاطران اونا تالانی کم ءِ۔ ہراتم منافع ودانے تو بینک آپریشن اٹی ودکی نا فیصلہ ءِ کرینے۔
