کوئٹہ ۔ 10مئی (اے پی پی) ہائیر ایجوکیشن کمیشن اسلام آباد ئِ یک پنچ باسکی ڈلے ئَ ڈائریکٹر ایچ ای سی سلمان احمد ئِ سروکیئَ بلوچستان مزن شاہ دربرجاھئِ ترءُ تاب کتگ۔ ڈل ئِ تہا ڈاکٹر حزب اللہ خان پشاور یونیورسٹی ، ڈاکٹر عامر اعجاز پنجاب یونیورسٹی، محمد زبیر اقراءیونیورسٹی لاہورءُ محمد علی بیگ اسسٹنٹ ڈائریکٹر ایچ ای سی ئَ جامعہ بلوچستان ئِ وائس چانسلر ڈاکٹر جاوید اقبال ئَ گوں گند ءُ نند کتگ۔ اے موھئَ جامعہ ئِ ڈین ڈاکٹر اختر محمد، ڈاکٹر ملک طارق احمد، ڈاکٹر ظہور احمد بازئی، رجسٹرار محمد طارق جوگیزئیءُ دگہ افسرھم ساڑی بوتگ اَنت۔ ڈل ئَ ایم فل ءُ پی ایچ ڈی ئِ تپاسی کتگ ءُ اے ھوالگئَ دراھیں کاگدءُ ریکارڈ چاراِتگ اَنت۔ ڈلءَ را دراھیں کلاس آنی ترءُ تاب کنائنگ بوتگ۔ اے وھدئَ ڈل ئَ نودربر،راھ دربر، ایم فل ءُ پی ایچ ڈی اسکالرز آں گوں جتاھ جتاھ گندءُ نند کتگ۔ ترءُ تابئِ ھلاسیئَ ڈلئَ جامعہ ئِ وائس چانسلرپروفیسرڈاکٹر جاوید اقبال ئَ گوں گند ءُ نند کتگءُ گندءُ نند ئِ تہا گوستگیں سئے سالانی تہا جامعہ ئِ دیم روئی ئَ ر ا ساڑاتگ ءُ سدکی ئِ درشانی کتگ۔ ایشیئِ گوما ڈل ئَ جامعہ ئِ دراھیں پروگرام ھاس ایم فل ءُ پی ایچ ڈی ئِ سرئَ سدّکی درشانی کتگءُ بے مٹیں کار کنگئِ سرئَ جامعہ ئِ رجسٹرار، ڈائریکٹر کیو اے ڈی ءُ چیئرمین جی ایس اوئِ کردئَ را ساڑاتگ ءُ اُمیت درشان کتگ کہ بلوچستان مزن شاہ دربرجاھ زوت پاکستانئِ مزنیں مزن شاہ دربر آنی ردئَ اوشت ایت۔
