کوئٹہ۔ 10 اکتوبر (اے پی پی) بنجائی وزیر سمندر پار پاکستانیز و شونداری انسانی وسیلہ ساجد حسین طوری کوئٹہ نا علاقہ نواں کلی ٹی ورکر فلیٹ آتا بناءِ کرے۔ سلاہکار وزیراعلیٰ بلوچستان نوابزادہ گہرام خان بگٹی، صوبائی سیکرٹری لیبر، سیکرٹری ورکرز ویلفیئر بورڈ و ایلو بنجائی و صوبائی آفیسر آک و لیبر تنظیمک ہم اوڑتون اوار ساڑی ئسر ، دوشنبےنادے آ کوئٹہ ٹی دود آن تران کرسا بنجائی وزیر سمندر پار پاکستانیز و شونداری انسانی وسیلہ ساجد حسین طوری پارے کہ چیئرمین پی پی پی بلاول بھٹوزرداری نا بلوچستان نا بابت خصوصی پارت آک ءُ اینو چار سد ءُ ہشت فلیٹ آتا بناءِ کننگا ہراکہ بروک آ اِرا تُو اٹی مزور آتا دوٹی تننگک، کنے بلوچستان نا مزور آتیکن چار سد ءُ ہشت اُرا تا بناءِ کرسا خوشی مننگ اٹی ءِ اینو بلوچستان نا خواری کش و مزور آتیکن بھاز خوشی نا وخت اسے، ساجد حسین طوری پارے کہ اگہ ملک اسے نا مزور آک شونہال مریر تو اونا شونداری ءِ کس اس توننگ کپک، ورکرآتا راجی آسراتی کن کوشست کننگ انگ ءِ و ہرممکن کوشست کینہ ای صوبائی سلاہکار خواری گہرام خان بگٹی و ورکرز ویلفیئر بورڈ بلوچستان نا سخت خواری تا ستاءِ کیرہ داسہ بروک آ ریسہ ٹی راولپنڈی، ٹیکسلا و مردان اٹی لیبر کالونی تا ہم بناءِ کننگ انگ ءِ نن بھلا دعویٰ تیا آخا بلکن عملی وڑاٹ مخلوق ءِ ریلیف تننگ آ یخین تخنہ۔ بنجائی وزیر سمندر پار پاکستانیز و شونداری انسانی وسیلہ ساجد حسین طوری پارے کہ پاکستان پیپلزپارٹی بلوچستان نامزور آتیکن چارسد اُرا تا ڈٹ انا بناءِ کریسس اللہ نا شکر ءِ کہ پیپلزپارٹی نا مسکوہی حکومت اٹی بناکروک آ ڈٹ اینو پورو مسنے نیزگار آتے اُرا تننگ نا قول پیپلزپارٹی نا قول ءِ و بلاول بھٹو زرداری ءِ اودے پورو کروئی ءِ ننا کوشست ءِ کہ ہر شاری نا اِرغ، پچ و ہند انا ویل ایسر مرے، اوپارے کہ ہر چار آ صوبہ غاتا ورکرز ویلفیئر بورڈ آتے فلیٹ و لیبر کالونی تے زوت آن زوت پورو کننگ نا پارت جاری کرینے، نجی فیکٹری تیٹی کاریم کروک آ نیزگار مزور آتے فلیٹ تننگک لیبرکالونی ٹی چناتیکن اسکول و گوازی تا پٹ تیار کننگک لیبر کالونی تیٹی ہروڑنا آسراتی فراوان کننگک، بنجائی وزیر ساجد حسین طوری پارے کہ بلوچستان نا مخلوق آن خواست کیوہ کہ پیشن نا ملک سکلڈ ورکر گدریفے، حکومت بلوچستان نا چندی شار تیٹی ورناتے پیشن گدریفنگ کن فنی تربیت نا ہند ملنگک بنجائی وزیر سمندر پار پاکستانیز و شونداری انسانی وسیلہ ساجد حسین طوری پارے کہ مزور آتا ہروڑنا حق و اوفتا چناتا تعلیم نا پور وخیال ءِ تخنہ و مزور آتا غٹ حق آتا ضمانت ایتنہ۔
