بیجنگ۔ 10 اکتوبر (اے پی پی) چین اٹی پاکستان نا سفیر معین الحق پارینے کہ چین نا وخت آ امداد نوکاپ زہمی تا بحالی کن کمکار مننگ اٹی ءِ، چینی اخبار گلوبل ٹائمز ءِ تروک آ انٹرویو ٹی اوپارے کہ چین نا مرکزی حکومت، فوج، صوبائی حکومت آک، آسودہی تنظیمک و سرکاری و نجی ادارہ غاتا کنڈآن 640 ملین یوآن (89.94$ملین ) آن زیات مالیت نا امداد نا پڑو کننگا وخت اس کہ چینی الس ہم سفارت خانہ نا براہ راست فلڈ ریلیف اکاؤنٹ اٹی عطیہ تس، اوپارے کہ پاکستان ءِ نوکاپ نا حالیت اٹ بدترین قدرتی آفت مون تروک ءِ و چین ہروارآنبار دا تنکی حالیت آتون مون تننگ نا دمدستی امداد فراوان کرے۔ پاکستانی سفیر پارے کہ چین نا انسانی ہمدردی نا بنداو آ امداد ہڑتوم آ ملک آتا سنگتی نا ڈیک ءِ۔ چینی حکومت نا کنڈآن نوکاپ زہمی تیکن تمبو، کمبل، کن وخور انا گڑا، دیر ءِ کُننگ نا قابل جوڑ کروک آ مصنوعات و بجلی نا جنریٹر آتیا تالان اولیکو کمکی کھیپ فراوان کننگانے وخت اس کہ ڈاکٹر و چاہندار آتیا تالان ٹیم تے ہم پاکستان آ گدریفنگ انگ ءِ اوپارے کہ چینی کمپنی چائنا تھری گورجز کارپوریشن نا کنڈآن کروٹ ہائیڈرو پاور اسٹیشن اٹی زرکاری کننگا ہرا 1.537 بلین کلو واٹ فی گھنٹہ نا جم بجلی نا پیدوار اتون بجلی فراوان کننگ ءِ۔ اوپارے کہ کروٹ ہائیڈرو پاور اسٹیشن چین پاکستان اقتصادی راہداری (سی پیک) نا رداٹ اسہ اہم ءُ ڈٹ اسے، ہراڑان ننا قومی گریڈ اٹی 720 میگاواٹ چاگڑد دوست بجلی اوار مسنے و ہنداوڑ ہرسال 3.5 ملین ٹن کاربن ڈائی آکسائیڈ نا پیش تمنگ ءِ کمک کننگ اٹ کمک رسینگانے۔ نوکاپ نا سوب آن خوش بختی اٹ پاکستان اٹ چینی ادارہ غاتا کنڈآن جوڑ کروک کروٹ و ایلو ہائیڈرو پاور ڈٹ آتے ہچ ءُ نسخان اس رسینگتنے، اوپارے کہ وزیراعظم محمد شہباز شریف 12 ہزار میگاواٹ شمسی توانائی نا دوئی کننگ نا ہدف مقرر کرینے وخت اس کہ چینی ادارہ غاتا تیار کروک چاگڑد دوست بجلی نا ڈٹ آک چاگڑدی بدلی نا اثرآتون مون تننگ و پاکستان نا زرگزران ءِ مون آ دننگ کن پاکستان نا کوشست آتے ودفنگ اٹ اہم کڑد ادا کرینے و کروٹ ہائیڈرو پاور و قابل تجدید توانائی نا ایلو ڈٹ آتیان ہندی وڑاٹ ہزار آ ملازمت آتا وارخواہی ودی مسنے۔ اوچینی کارندہ و ڈٹ آتا رکھ ءِ پک کننگ کن پاکستان نا عزم انا درشانی ءِ کرے۔ اوپاکستان اٹی تدوک آ سال 14 جولائی آ داسو ہائیڈرو پاور اسٹیشن ڈٹ آ مروک آ دہشت گرد جلہو نا ذکر ءِ کرسا پارے کہ چین پاکستان سنگتی نا مخالف آتا کنڈآن کروک آ گندہ انگا جلہو ترند رفتار اقتصادی شونداری ءِ زہمی کننگ نا بےسہب ءُ کوشست اس ئسک ولے ہڑتوم آ ملک آتا کنڈآن قائدانہ عزم و کارندہ غاتا خواری نا سوب آن غٹ شونداری ڈٹ آتیا کاریم برجاسلیس و داسو ہائیڈرو پاور اسٹیشن ڈٹ آ است ہسون جلہو آن پد دمدستی کاریم نا بناءِ کننگا۔ اوپارے کہ پاکستان چینی شاری تا رکھ و پاکستان اٹی زرکاری ءِ بھاز اہمیت ایتک ، نن اواری اٹ مخالف آتا ناپاک عزم ءِ شکست ایتنہ۔
