اسلام آباد۔ 10 اکتوبر (اے پی پی) وزیراعظم شہباز شریف ءِ چاگڑدی بدلی تا باندات ءِ گچین وڑاٹ تالان کننگ آ اقوام متحدہ نا چاگڑدی بدلی و ویل آتا ایسری نا بابت تنظیم (سی او پی۔27) نا نائب صدارت ءِ تننگ نا پڑو کننگانے، اقوام متحدہ نا 195 ملک آتیان پاکستان نا وزیراعظم ءِ دا منصب کن گچین کننگ بھاز بھلو جہانی شرفمندی اسے۔ دوشنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم شہباز شریف کانفرنس آف پارٹیز(سی۔او۔پی) نا دیوان نا ناروے نا وزیراعظم، مصر انا صدر تون اوار اسیجائی کماشی ءِ کیک۔ دا دیوان شرم الشیخ، مصر اٹی 6 آن 18 نومبرآ مریک۔ یات سلے کہ داوخت آ ’’سی ۔او۔پی۔27‘‘ نا کماشی مصر اتون ءِ۔ مصر انا صدر عبدالفتاح السیسی وزیراعظم شہباز شریف ءِ’’سی ۔او۔پی۔27‘‘ دیوان نا اسیجائی کماشیءِ کننگ نا سلہ خلکنے۔ دیوان اٹی جہانی سروک آک، حکومت آتا سروک آک، جہانی مالیاتی ادارہ غاک و تھنک ٹینکس انا زموار آک بشخ ہلیرہ۔ اقوام متحدہ نا کنڈآن چاگڑدی بدلی نا ویل و اوفتا ایسری نا بابت دا 27 می دیوان مریک۔ وزیراعظم شہباز شریف نا چاگڑدی بدلی تا بابت آ پراثر توار آاودے دا منصب ءِ تننگا۔ ساڑی آ نوکاپ آن پد وزیراعظم شہباز شریف شنگھائی کمکار تنظیم (ایس۔سی۔او) نا سربراہان مملکت و حکومت نا کونسل و اقوام متحدہ نا جنرل اسمبلی نا 77 می دیوان اٹی چاگڑدی بدلی تیا گچین توار بڑز کریسس۔ چاگڑدی بدلی تا ویل ءِ ’’ایس۔ سی ۔او‘‘تنظیم نا کہول آ ہرفنگ نا وزیراعظم شہباز شریف نا سلاہ تا ایلو ملک آک تائید ءِ کریسر۔ شنگھائی کمکار تنظیم نا سربراہان مملکت و حکومت نا کونسل نا دیوان 15 آن 16 ستمبر آ سمر قند اٹی مسوسس۔
