تھر۔ 10 اکتوبر (اے پی پی) وزیراعظم محمد شہباز شریف تھرکول ءِ زرگزرانی شونداری کن گیم چینجر اس گوندسا پارینے کہ تھرکول ڈٹ علاقہ نا شونداری و شونہالی نا ڈٹ ءِ، تھرانا کولا آن بجلی نا پیدوار آن بھلو زرمبادلہ اسے نا بچت مریک، کولاآن بجلی ودی کروک آ غٹ پاور پلانٹ آتے تھرانا کولاغا گدریفوئی مریک، سی پیک نا رداٹ توانائی نا بشخ اٹی زرکاری چین نا بھاز بھلو ٹیکی اسے، ریلوائی لنک آن تھر انا کولانا مچ آ ملک اٹی فراوانی ٹی آسانی مریک۔ داخیال آتا درشانی ءِ او دوشنبےنادے آ داڑے تھر انرجی بلاک ٹو و تھرکول مائنز ٹو انابنائی دود آن تران کرسا کرے۔ داوخت آ وزیرخارجہ بلاول بھٹو زرداری ، مسکوہی وزیراعظم شاہد خاقان عباسی، بنجائی وزیر ڈٹ بندی احسن اقبال، بنجائی وزیر خرم دستگیر خان، وزیر مملکت پیٹرولیم مصدق ملک، وزیراعلیٰ سندھ سید مراد علی شاہ ، پاکستان اٹی چین نا سفیر نونگ رونگ و ایلو اہم شخصیت آک ساڑی ئسر۔ وزیراعظم پارے کہ مشکل آتیان پد ہم ڈٹ انا پوروی آ چیئرمین حبکو و اونا ٹیم اتون اوار غٹ ءِمبارکبادی ایتیوہ۔ 1996 ٹی مسکوہی وزیراعظم شہید بے نظیر بھٹو ہراتم دا علاقہ نا دورہ غا بس تو داڑے صحرائسک ولے داسہ تھر ترندی اٹ شون ہلنگ ءِ۔ تھرکول ڈٹ علاقہ نا شونداری و شونہالی نا ڈٹ ءِ۔ دنیا ٹی کولا نا نہاد 67 ڈالر فی ٹن آن کم مرسا 44 ڈالر آ بسنے و دا پین کم مرسا 30 اسکان بننگ نا گمان ءِ، تھر انا کولاآن داوخت آ ودی مروک آ بجلی نا ہرا نہاد ءِ او کم مرسا 10 روپئی فی یونٹ مریک۔ تھرکول پوسکن آ ٹیکنالوجی آن پورو مروک آ ڈٹ ءِ۔ تھراناکولا آن بجلی نا پیدوار آن کثیر ملکی زرمبادلہ بچت مریک۔ وزیراعظم پارے کہ تھراٹی 175 ملین ٹن کولانا کوڑی ساڑیءِ و اسہ لکھ میگاواٹ بجلی اگہ نن ودی کین تو دا 300 سال انا خزانہ ءِ۔ نن ہندن ءُ پالیسی جوڑ کین کہ کولاآن بجلی ودی کننگ نا 4 ہزار میگاواٹ نا ہراکارخانہ غاک ءُ اوفتے ہم تھر انا کولاغا گدریفنگے۔ دنیا ٹی تیل انا نہاد آتیٹی شیف بڑزی نا سوب آن ننے سنجیدگی اٹ داڑآ سجفوئی مریک۔ توانائی گرج آتے پورو کننگ کن 24 ارب ڈالر خڑچ کننگانے۔ کولاآن فائدہ ہرفسا ملکی صنعت آک شون ہلیرہ، اڑزان مصنوعات ودی مریک۔ زالبول ٹرک ڈیور آتون ہم اوڑدہی مسنے۔ تھر اٹی حکومت نا گام گیج آتیان ہزار آ مخلوق کن روزگار نا وارخواہی دُو بننگ ءِ۔ اوپارے کہ سی پیک نا رداٹ توانائی نا بشخ اٹی زرکاری چین نا بھاز بھلو ٹیکی اسے۔ بروک آ ہفتہ اسلام آباد اٹی اسہ دیوان اسے نا کماشیءِ کیوہ ہراٹی غٹ تعلقدار فریق آتے بشخ ہلنگ نا سلہ خلنگک و توانائی نا بشخ انا بابت گام گیج آتا جاچ ءِ ہلنگک۔ وزیراعظم پارے کہ تھرانا کولا آن فائدہ ہرفپننگ و قوم انامحرومی تے کم کپننگ بھاز بھلو ردینک اسے۔ تھرانا کولا آن مچ آ پاکستان ءِ فائدہ تننگ مریک۔ کولانا فراوانی کن ریلوائی نا اسہ مربوط ءُ نظام اس جوڑ کروئی مریک۔ دا بابت بنجائی و سندھ حکومت آک اوار ی اٹ کاریم کیرہ۔ سنگل ریلوائی لائن کن معاہدہ مسنے۔ ریلوائی نا ڈٹ پورو مس تو داڑآن تھر انا کولا ملک انا ہرچار آ کونہ غاتیا سرمریک و سالانہ 5 آن 6 ارب ڈالر نا بچت مریک۔ بجلی نا پیدوار نا دا ڈٹ انا پوروی ٹی حبیب بینک، چائنا ڈویلپمنٹ بینک مالی کمک کرینو۔ تھرکول ملکی زرگزرانی شونداری کن گیم چینجر اس پک مریک۔ داوخت آ تران کرسا وزیرخارجہ بلاول بھٹو زرداری پارے کہ تھرکول ڈٹ بناکننگ آن تھرانا الس ءِ روزگار ملانے۔ دسمبر اٹی اسہ پین ڈٹ اسے نا بناءِ کننگک۔ کس اسے گمان اَلوکہ کہ تھرپارکر نا ریگستان آن کولادوئی مریک۔ ننے شونداری نا اسہ پوسکن ءُ چرجوئی اسے نا بناءِ کروئی مریک۔ صوبہ ٹی تاریخ نا بھاز بھلو نوکاپ اس بس۔ دے و نن خواری کین تو اسہ سال اٹی گرین انرجی ٹی انقلاب بننگ کیک۔ سرکاری و نجی بشخ انا اواری اٹ کاریم کننگ آن مروک آ شونداری نا اثر الس آ ہم تمک۔ اوپارے کہ تھر انا الس کن حکومت آسراتی فراوان کننگ ءِ۔ تھر انا سوب آن پاکستان بدل مسنے۔ صوبائی حکومت تینا زمواری تے پورو کرینے و دا چرجوئی ٹی بنجائی حکومت ہم پورو کمک کرینے۔ تھر آن بجلی نا پیدوار نا ڈٹ چین پاکستان سنگتی نا شاہدی ءِ۔ وزیراعلیٰ سندھ مراد علی شاہ تران کرسا پارے کہ تھر اٹی 330 میگاواٹ نا اسہ پین ڈٹ اسے نا بنادسمبر اٹی مریک و بروک آ سال انا اولیکو سہ ماہی اسکان جم وڑاٹ 2640 میگاواٹ بجلی تھر آن اوار مریک۔ صوبہ ٹی کولا و گیس انا بھلو کوڑی اس ساڑی ءِ۔ ونڈ کوریڈور آن 50 ہزار میگاواٹ بجلی ودی مننگ کیک۔ شمسی توانائی نا پیدوار ہم سندھ و بلوچستان اٹی بھاز بھلو لائخی اسے۔ تھر انا بلاک ٹو انا رہینگوک آتیکن 2 پوسکن ءُ خلق جوڑ کرسا ہموڑے اوفتے پوسکن آ آسراتی فراوان کرینن و فی خاہوت اسہ لکھ روپئی منافع ہم تننگ انگ ءِ۔ پاکستان اٹی چین نا سفیر نونگ رونگ پارے کہ ڈٹ آ کاریم کروک آتے گچین سیکورٹی فراوان کننگ آ پاک فوج انا منت وار اُن۔ تھربلاک ون و ٹو آن پاکستان ءِ زرمبادلہ نا بچت مریک۔ بجلی نا پیدوار ودک۔ ملازمت آتا وارخواہی ودک۔ سی پیک ڈیہہ نا شونہالی نا شاندار ءُ ڈٹ اسے۔ اولیکو ریسہ ٹی بجلی نا پیدوار ٹرانسمیشن نیٹ ورک و شاہراہ تا تفنگ آ چکار کننگا۔ ارٹ میکو ریسہ ٹی کشاری بشخ اٹی کمکاری، صنعتی سرجزآتیٹی ودکی و ٹیکنالوجی نا گدریفنگ کن کاریم مریک۔ سی پیک آن پاکستان اٹی 85 ہزار ملازمت آتا وارخواہی ودی مسنے۔ چین نوکاپ زہمی تا کمک کن ہم 90 ملین ڈالر پاکستان ءِ فراوان کننگ نا پڑو کرے۔ ڈیزاسٹر مینجمنٹ نا چاہندار آتیا تالان چینی ٹیم پاکستان آ سرمننگ ءِ۔ چین پاکستان ءِ آئرن برادر نا وڑاٹ مون آ ہنسا و شون ہلسا ہُننگ خواہک۔ داوخت آ صوبائی وزیر توانائی امتیاز شیخ و چیئرمین حبکو حبیب اللہ خان ئسک ہم تران کریر۔
