8 اکتوبر نا دے ہموغٹ خاہوت آتون تینا یکجہتی و ہمدردی نا درشانی ءِ کننگ نا موقع ءِ ہرا قدرتی آفت آتا گواچی مسر، صدر مملکت ڈاکٹر عارف علوی نا کلہو

اسلام آباد۔ 08 اکتوبر (اے پی پی) صدر مملکت ڈاکٹر عارف علوی پارینے کہ 8 اکتوبر نادے ہمو غٹ خاہوت آتون تینا یکجہتی و ہمدردی نا درشانی ءِ کننگ نا اسہ موقع اسے ہرا قدرتی آفت آتا گواچی مسر، داننے 2005 نا بھسکار زمی جمب نا یات ترفک ہرا آزاد جموں و کشمیر، صوبہ خیبرپختونخوا نا گڑاس بشخ و اسلام آباد اٹی بھسکاری کریسس، نن دا موقع ءِ اسہ مشن و عزم اسے تون اڈ ایتنہ تانکہ آفت آتا برخلاف قوم انا لچک ءِ گچین و ودفسا قومی تیاری ءِ مون آ دننگے۔ صدر مملکت داخیال آتا درشانی ءِ 8 اکتوبر 2005 نا است ہسون زمی جمب نا بابت تینا کلہو اٹی کرے۔ اوپارے کہ موسمیاتی بدلی نا رجحان اسہ وار ولدا ننے بھا زیات زہمی کرینے، صدر جہانی برادری آ زور شاغا کہ او پاکستان ءِ موسمیاتی بدلی نا منفی اثرآتون مون تننگ کن ہرممکن کمک فراوان کے۔ صدر مملکت پارے کہ داسال بشام نا سیزن اٹی مچ آ پاکستان اٹی تدوک آ 30 سال انا اوسط انا مقابلہ ٹی 190 درسد زیات پِر مس، سندھ و بلوچستان نا صوبہ غاتیٹی پِر تیٹی کم و ود 500 درسد زیات پِر انا نتیجہ ٹی سندھ و بلوچستان نا گڑاس بشخ آتیٹی بھلو کچ اسے آ نوکاپی حالیت ودی مس، داکان بیدس مشی آ علاقہ غاتیٹی ترند پِر تیان پنجاب، خیبرپختونخوا، گلگت بلتستان و آزاد جموں وکشمیر اٹی ہم نوکاپ بس۔ اوپارے کہ دا چاگڑدی آفت نا نتیجہ ٹی 1695بندغ زوال و کم و ود 13 ہزار بندغ ٹھپی مسنو، 2 لکھ آن زیات ہند آتے نسخان رسینگا و 40 لکھ ایکڑ آن زیات رقبہ غا فصل و بنداوی پنجر ءِ بھاز نسخان رسینگا۔ صدر مملکت پارے کہ پاکستان دا چاگڑدی حالیت آتیان 33 ملین آن زیات مخلوق زہمی ءِ و لکھ آ بندغ آتے انسانی بنداو تیا امداد نا گرج ءِ۔ ڈاکٹر عارف علوی پارے کہ چاگڑدی بدلی تیٹی پاکستان نا بشخ مفننگ نا بریبر ءِ وخت اس کہ او داغٹ آن زیات گواچی مسنے۔ صدر پارے کہ 2005 آن پد آن وار وار بھلا شدت نا چندی آفت آتا گواچی مننگ آن پد ہم پاکستانی الس ہمت، بے لوث، قربانی نا جوزہ و آزمائشت نا ساہت آتا مقابلہ ءِ کننگ کن لچک نا درشانی ءِ کرینے۔ اوپارے کہ دا دے ءِ ’’قومی لچکداردے‘‘ انا وڑاٹ ہم اسٹاک ٹیکنگ نا اسہ موقع اسے و داوڑنا غٹ مشکل آتون مون تننگ کن تینے تیار کننگ کن زیات آن زیات کوشست کننگ نا تینا عزم انا درشانیءِکیک۔ صدر مملکت پارے کہ قومی لچک نا دے ءِ اڈتننگ ننے گچین وڑوڈول آتے تینا کننگ، درکار پالیسی گام گیج و حکمت عملی تے نافذ کننگ نا گرج انا یات ترفک ہرانا مسخت قوم اٹی لچک ودی کننگ ءِ۔ اوپارے کہ ملک اٹی پالیسی گام گیج آتے اہم بشخ بشمول انفراسٹرکچر نا لچکدار و رکھ شونداری اٹ نیزگاری نا چٹفنگ، ڈغار نا رکھ کاریم اٹ اتنگ نا ڈٹ بندی، بلڈنگ کوڈ آ عمل درآمد، آبی وسیلہ غاتا بست وبند، کشاری وڑوڈول آتے گچین کننگ و کرکی علاقہ غاتون اوار مچ آ پاکستان اٹی جنگل آتیٹی ودکی آن قدرتی آفت تون مون تننگ نا لائخی ءِ بایدے ودفنگے۔ صدر مملکت پارے کہ غٹ بنجائی و صوبائی تعلقدار فریق آتیا زور شاغا کہ او ننا نزوری تا رداٹ ترند رفتار و دمدستی ردعمل نا وڑوڈول ءِ ودفنگ آن بیدس آفت آتا خطرہ ٹی کمتی و تیاری ءِ پک کننگ کن عمل اٹ ہم گرنچی ودی کیر۔ اوپارے کہ نن راج انا نزور تپہ بشمول زالبول، چنا ، بزرگ و معذور بندغ آتا خیال ءِ تخن۔ اوجہانی برادری، سول سوسائٹی و نجی سخی تا کنڈآن نوکاپ آن مروک آ بھسکاری ٹی قومی ردعمل نا کوشست آتے ودفنگ کن تروک آ پبی کمک و امداد نا ستاءِ کرے۔ اوجہانی برادری آ زور شاغا کہ او پاکستان ءِ موسمیاتی بدلی نا منفی اثرآتون مون تننگ کن ہرممکن کمک فراوان کے۔ اوداپکا یخین نا درشانی ءِ کرے کہ پاکستانی الس مستین آنبار نوکاپ آن زہمی علاقہ غاتیٹی تینا ایڑھ و ایلم تا است انا حب اٹ کمک ءِ کرسا کیک۔