جہانی منڈی ٹی تیل و ڈالر نا قدر اٹی کمتی نا سوب آن بروک آ تُو الس ءِ بھلو ریلیف اس ملک،بنجائی وزیر بجلی انجینئر خرم دستگیر خان

اسلام آباد۔ 07 اکتوبر (اے پی پی) بنجائی وزیر بجلی انجینئر خرم دستگیر خان پارینے کہ جہانی منڈی ٹی تیل و ڈالر نا قدر اٹی کمتی نا سوب آن بروک آ تُو آن فیول پرائس ایڈجسٹمنٹ نا مد اٹی الس ءِ بھلو ریلیف اس ملک، حکومت داتم اسکان 300 ءیونٹ آن کم بجلی کاریم اٹ اتوک آ صارف، بزغر و نوکاپ زہمی تے بجلی نا بل آتا مد اٹی 65 ارب روپئی نا ریلیف تسنے۔ جمعہ نادے آ قومی اسمبلی ٹی گپ وتران کرسا بنجائی وزیر پارے کہ تدوک آ تُو تیٹی فیول پرائس ایڈجسٹمنٹ نا سوب آن کبینی بسوسس ہراڑآن الس ءِ تکلیف مس، جون اٹی فیول پرائس ایڈجسٹمنٹ اگست اٹی بجلی نا بل آتیٹی اوار مس ہرا 10 روپئی ئسک، داسہ تیل انا نہاد آتیٹی کمتی مسنے ، ڈالر نا قدر اٹی ہم کمتی بسنے ہنداخاطرآن بروک آ تُو آن بجلی نا فیول پرائس ایڈجسٹمنٹ نا مد اٹی نہاد کم مرسا دہ پیسہ مسنے، داڑآن بروک آتُو انا بل آتیٹی پیدوار ریلیف ملک۔ اوپارے کہ وزیراعظم شہباز شریف نا پارت آ الس ءِ مالیاتی ریلیف فراوان کننگانے، دا تُو بجلی نا بل آتیٹی ہم کمتی بسنے ولے بروک آ تُو آن الس ءِ پیدوار ریلیف ملک۔ وزیراعظم نا پارت آ 200 آن ہلیس 300 یونٹ اسکان بجلی کاریم اٹ اتوک آ صارف ، بزغر و نوکاپ زہمی تے ریلیف تننگ کن داتم اسکان 65 ارب روپئی نا سبسڈی تننگانے۔ بنجائی وزیر پارے کہ اینو ایوان نا دیوان اٹی اسلم بھوتانی تینا و حب انا علاقہ ٹی بجلی نا کارخانہ غاتیان چاگڑدی نسخان و ہندی وڑاٹ روزگار نا گڑاس باندات آتے ہرفینے، ای اسلم بھوتانی ءِ باوری کرفیوہ کہ بروک آ دے تیٹی بجلی ناکارخانہ غاتا چیف و عہدیدار آتا اوڑتون میٹنگ اس کرفنہ و اونا گڑتی تے چٹفنگک۔ اومستی پارے کہ کمپنی تا ہرا ہندی زمواریک ءُ اوفتے پورو کننگ نا ہم پبی کوشست کننگک۔