قوم ءِ اسیجا سلوئی مریک، ہراسٹ پارلیمان نا پیشن نا کسر ءِ گچین کرینے او سیاست آن پیشن مریک، سید خورشید احمد شاہ

اسلام آباد۔ 07 اکتوبر (اے پی پی) بنجائی وزیر آبی وسیلہ سید خورشید احمد شاہ پارینے کہ پاکستان جنگ و اختلاف آتے سگنگ کپک، قوم ءِ اسیجا سلوئی مریک، ہراسٹ پارلیمان آن پیشن نا کسر ءِ گچین کرینے او سیاست آن پیشن مریک، نوکاپ آ ایوان اٹی سرجم شرہ اس بایدے مرے۔ جمعہ نادے آ قومی اسمبلی ٹی گپ وتران کرسا اوپارے کہ نوکاپ ہرا بھسکاری ءِ کرینے اوڑا ایوان اٹ بایدے ہیت مرے، پاکستان و ہمسایہ ملک آتیٹی ہرا نسخان مس اونا مستین اٹ درور ملیپک ۔ محکمہ موسمیات 30 آن 40 درسد آن زیات پِر انا پیشنگوئی کریسس ، نوشہرہ فیروز اٹی 1780 ملی میٹر پِر مس، ساڑی آ نوکاپ پاکستان نا زرگزران ، بنداوی پنجر ءِ بھس کرینے۔ چاگڑدی بدلی تیان پاکستان ءِ ملوک آ نسخان نا داسہ جہانی برادری ہم اعتراف ءِ کننگ اٹی ءِ، اینو ہم سندھ و بلوچستان اٹی 6 آن ہلیس 8 فٹ اسکان دیر سلوک ءِ۔ ایلو ملک آتا سوب آن موسمیاتی بدلی پاکستان ءِ زہمی کننگ ءِ۔ اوپارے کہ سندھ اٹی 80 درسد فصل آک بھس مسنو، ضلع خیرپور اٹی اِلار نا درخت آتا بھسکاری آن ارب آ روپئی نا نسخان مسنے۔ اگہ دیر ءِ کشنگتو تو اِلار نا یک و نیم کروڑ درخت بھس مریرہ۔ اگہ اسہ سال انا تہہ ٹی نن بنداوی پنجر اس جوڑ کتون تو نسخان اٹی پین ودکی مریک۔ اوپارے کہ سروے نا گرج اف انتئے کہ نوکاپی دیر کل ءِ پیدوار کرینے اوپارے کہ سیاست کرینگ نا آخا بلکن الس نا ویل آتے ایسر و مداوا نا پن ءِ۔ سیاستدانک گلی کوچہ و خلق آتیا ہنانو۔ اِرا تُو آن نوکاپ آن زہمی علاقہ غاتیٹی کاریم کننگ اٹی اُٹ، ای فوٹوسیشن کن ہنپرہ۔ اوپارے کہ پارلیمنٹ واکدار ءُ ادارہ اسے ، اودے نزور بایدے کننگپ۔ ہراسٹ پارلیمان آن پیشن نا کسر ءِ گچین کرینے او سیاست آن پیشن مریک ، کنا وزیراعظم آن اپیل ءِ کہ او داایوان آ برے و قوم و باسک آتے پت اٹی ہلے۔ داایوان نوکاپ نا بابت جامع قرارداد و نوکاپ نا رداٹ اولیت آتا تعین ءِ کے۔ کشت وکشار ءِ سبسڈی تننگ المی ءِ، سندھ حکومت خولم نا کمکی نہاد 4000 روپئی مقرر کرینے، دا بزغرآتیکن اسہ بھلوریلیف اسے، پاکستان درآمدی خولم 55 سد روپئی ٹی ہلنگ ءِ، نن تینا بزغرآتے بایدے فائدہ ایتن۔ قوم ءِ اسیجا غا سلوئی مریک۔ اسپیکر ہم دابابت تینا کڑد ءِ ادا کے۔ اوپارے کہ ہرا باسک مسہ سیشن اٹی بفک اودے ایوان آن پیشن کننگے، ہراسٹ ہم پارلیمان ءِ شرف تس اودے پارلیمان ہم شرف ایتک۔