لائنز کلب نوکاپ آن زہمی علاقہ غاتیٹی 5 ءُ نیم کروڑ روپئی آن 100 اُرا تفک ایتک، محمد اظہر

فیصل آباد۔ 06 اکتوبر (اے پی پی) لائنز کلب نوکاپ آن زہمی علاقہ غاتیٹی 5 کروڑ روپئی آن 100 اُرا تفک ایتک ہرافتیان ہر اُرا نا خڑچ انا کساس 4 لکھ 80 ہزار روپئی خلنگانے ہرادے 4 لکھ 30 یا 40 ہزار اسکان کننگ مریک۔ داہیت ءِ لائنز کلب نا نمائندہ و فلڈ ریلیف کمیٹی نا باسک محمد اظہر فیصل آباد چیمبرآ ف کامرس اینڈ انڈسٹری نا پوسکن گچین مروک صدر ڈاکٹر خرم طارق نا کماشی ٹی اڈ ہلوک فلڈ ریلیف نا بارواٹی کمیٹی نا دیوان اٹی پارے  ہراٹی مسکوہی صدر میاں محمد جاوید اقبال، سینئر نائب صدر ڈاکٹر سجاد ارشد، نائب صدر محمد اسلم بھلی، آل پاکستان بیڈ شیٹس اینڈ اپ ہولسٹری مینوفیکچررز ایسوسی ایشن نا عارف احسان ملک، حاجی محمد عابد، ڈائز اینڈ کیمیکلز ایسوسی ایشن نا محمد عاصم، عبداللہ قادری، محمد اظہر چوہدری و ایلوباسک آک ہم بشخ ہلکر۔ داوخت آ پاننگاکہ فیصل آباد چیمبرآف کامرس اینڈ انڈسٹری نوکاپ زہمی علاقہ غاتا رہینگوک آتے ملیریا غان بچفنگ کن بھلو کچ اسے ٹی مچھر نرنگ موسپل لوشن ہلکنے ہرافتا بشخنگ کن المی گام گیج کننگ انگ ءِ۔ حاجی محمد عابد ہرا ساڑی ہی ٹی کمکی گڑا تا ارٹ میکو کھیپ ءِ بشخسا پدی سرمسنے اوبلوچستان نا زیات زہمی علاقہ غاتا حالیت آتا بارواٹی معلومدار کرے و پارے کہ راجن پور آن دیر پیش تمانے ولے بلوچستان نا بھاز انگا علاقہ غاک دیر اٹی ءُ۔ اوپارے کہ دامخلوق نا غٹ آن نہادی زر اوفتا ساہدارآک ءُ ہرافتکن بے ہم دوئی اف۔ میاں محمد جاوید اقبال پارے کہ نن زہمی تا کمک ءِ بیرہ اللہ نا رضاکن کین و ریسکیو ، کمکی و بھالی سرجزآتون اوار اوار ہر ریسہ ٹی تینا کچ انا رداٹ بشخ شاغن۔ اوزہمی علاقہ غاتیٹی ملیریا نا بابت پارے کہ او بھلو کچ اسے ٹی موسپل خواہفینے ہرافتا بشخنگ کن دا علاقہ غاتیٹی کاریم کروک آ رفاعی و آسودہی تنظیم تتون اسیجائی وڑاٹ کاریم کننگ مریک۔