اقوام متحدہ۔ 06 اکتوبر (اے پی پی) اقوام متحدہ نا جنرل اسمبلی نا دیوان اٹی پاکستان اٹی نوکاپ آن مروک آگیشتر بھسکاری آ پاکستانی الس و حکومت تون یکجہتی و مخ تفی نا درشانی ءِ کننگ کن مسودہ قرارداد آ کارروائی کیک۔ پنچ شنبے نادے آ اقوام متحدہ نا 193 باسکی جنرل اسمبلی نا صدر نا ترجمان پولینا کوبیک اسہ حوال اسے ٹی پارے کہ جنرل اسمبلی جمعہ نادے آ پاکستان کن پیش کروک آ قرارداد نا مسودہ غا کارروائی کیک ہراٹی نوکاپ آن مروک آ جانی و مالی نسخان تیا پاکستان نا الس و حکومت تون یکجہتی و مخ تفی نا درشانی ءِ کننگانے، پاکستان اٹی بروک آ نوکاپ اٹی 1700 آن زیات بندغ زوال و 33 ملین بے اُرا مسنو۔ اوپارے کہ جنرل اسمبلی نا دیوان اٹی پاکستان نا انسانی امدادو بحالی کن کوشست آتیٹی ترندی کن جہانی برادری آ تننگک و باسک ملک آک ، اقوام متحدہ و انسانی حق انا تنظیم تا است بڈی ءِ کننگک کہ او زہمی آبادی خاص وڑاٹ غٹ آن زیات خطرہ غان دوچار بندغ آتا گرج آتے پورو کننگ کن اواری اٹ کاریم کرسا کریر۔ ترجمان کوبیاک پارے کہ ساڑی ہلہلہ ئی امداد آن بیدس جہانی برادری نا گرج آ ہم چکار کروئی مریک تانکہ نیامی و مریس مدتی بحالی، تعمیر نو و خطرہ ٹی کمتی نا کوشست آتون اوار اوار حکومت پاکستان نا موافقت نا ڈٹ آتا مخ تفی کن سیاسی عزم ءِ برقرار تخنگ مرے۔ ترجمان جنرل اسمبلی مستی پارے کہ دا قرارداد اٹی بھاز انگا شریک سپانسر مننگ ناگمان ءِ و دا بھسکاری آن زہمی علاقہ غاتیٹی مریس مدتی بحالی و تعمیر نو نا ریسہ غاتیکن امداد و پین کمکی قول آتے کن اسہ عہد ساز کانفرنس اس بٹنگ نا ہم خیرمقدم ءِ کیک۔
