بھلا چیلنج نوکاپ زہمی علاقہ غاتیٹی ساڑی شش لکھ پڈ پُر زالبول آتے جان جوڑی آسراتی تا فراوانی و لمہ و چنانا جون ءِ بچفنگ ءِ، بنجائی وزیر عبدالقادر پٹیل

اسلام آباد۔ 06 اکتوبر (اے پی پی) بنجائی وزیر قومی جان جوڑی عبدالقادر پٹیل پارینے کہ ننکن غٹ آن بھلا چیلنج نوکاپ زہمی علاقہ غاتیٹی ساڑی آ شش لکھ آن زیات پڈپُر زالبول آتے جان جوڑی نا آسراتی تا فراوانی و لمہ و چنانا جون ءِ بچفنگ ءِ۔ زہمی علاقہ غاتیٹی ہیلتھ کیمپ خلنگ انگ ءِ ہراڑے ٹائیفائیڈ ، جلد و نمونیا تون اوار چندی ناجوڑی تا درمان برجاءِ۔ داخیال آتا درشانی ءِ او گلوبل فنڈ انا پاکستان نا سینئر منیجر ازسکان تون اوڑدہی ٹی کرے۔ پاکستان اٹی گلوبل فنڈ انا وزارت جان جوڑی نا کمامدارآتون بروک آ مسہ سال انا امداد نا بارواٹی گپ وتران مس۔ داوخت آ گلوبل فنڈ انا سینئر منیجر ازسکان پارے کہ مشکل حالیت آتیان پد ہم بنجائی حکومت نا نوکاپ زہمی تا کمک و اوفتا جان جوڑی نا بابت گام گیج ستاکڑزک۔ اوپارے کہ گلوبل فنڈ انا کمک اٹ پاکستان نا جان جوڑی نا کمامدارآک ٹی بی ، ایڈز، ملیریا و پبلک ہیلتھ اٹی گچین کاریم سرتسنو۔ اونا پاننگ ئس کہ نن آخبت ہم حکومت پاکستان تون اواری اٹ جان جوڑی نا ویل آتے ایسر کننگ نا بابت غٹ ممکن گام گیج کینہ۔ اوڑدہی ٹی کامن میڈیکل یونٹ نا نیشنل کوآرڈینیٹر مصطفیٰ جمال قاضی ہم ساڑی ئسک۔