مچ آ دنیا تنکی کیفیت آن گدرینگ انگ ءِ، کوویڈ نا زرگزرانی تنکی آن دنیا داسکان پیش تمنگ کتنے، احسن اقبال

اسلام آباد۔ 06 اکتوبر (اے پی پی) بنجائی وزیر ڈٹ بندی و شونداری پروفیسر احسن اقبال پارینے کہ مچ آ دنیا تنکی کیفیت آن گدرینگ انگ ءِ، کوویڈ نا زرگزرانی تنکی نا صدمہ غان دنیا داسکان پیش تمنگ کتنے، پاکستان دا چاگڑدی بدلی نا گواچی مسنے ہرادے شون ہلوک ملک آک داسکان افسانہ اس تکارہ، نوکاپ پاکستان نا ہمو علاقہ غاتے زہمی کرے ہرامہالو آن پسماندہ ئسر۔ داخیال آتا درشانی ءِ او پنچ شنبے نادے آ داڑے جہانی شونداری و سیکورٹی نا گام گیج آتا بابت اڈ ہلوک کانفرنس آن تران کرسا کرے۔ اوپارے کہ مچ آ دنیا اسہ جہانی تنکی اسے نا گواچی ءِ ، کوویڈ نا زرگزرانی تنکی نا صدمہ غان دنیا داسکان پیش تمنگ کتنے کہ عین ہمووخت آ یوکرین نا تنکی مچ آ دنیا ءِ تینا پلویڑ اٹی ہلک و دانا سوب آن مچ آ دنیا ٹی کنوئی آ گڑاتا نہاد آتیٹی ریکارڈ ودکی مس و ہموملک آک ہم کبینی ءِ خنار ہرا کبینی نا تصور ہی اَلوکہ۔ اوپارے کہ روس یوکرائن جھیڑہ نا سوب آن دنیا افراط زر انا زد اٹی ءِ، دنیا بیلنس آف پے منٹس و زرگزرانی تنکی آن گدرینگ انگ ءِ و اینو غٹ ملک آک پائیدار شونداری نا ہدف آتا پوروی نا کوشست کننگ ءُ۔ احسن اقبال پارے کہ پاکستان ءِ چاگڑدی بدلی مون تروک ءِ ، اینو چاگڑدی عوامل آتا بدلی نا نہاد پاکستان نا نیزگار الس ءِ ملنگ ءِ ، نوکاپی آفت 33 ملین بندغ ءِ زہمی کرے۔ اوپارے کہ مخلوق ءِ ننے داسہ دُوارہ زند انا کنڈآ پدی اتوئی ءِ۔ بنجائی وزیر پارے کہ پاکستان اٹی بیلٹ اینڈ روڈ گام انا غٹ آن بھلا پروجیکٹ سی پیک ئسک، سی پیک  پاکستان نا انفراسٹرکچر ءِ جوڑ کننگ اٹ کمک کرے۔ توانائی نا بشخ اٹی شونداری مس، نن بدبختی اٹ سی پیک نا رفتار ءِ برقرار تخنگ کتون ہرانا سوب آن صنعتی زون تاخیر نا گواچی ءِ۔