چارسال اٹی سی پیک ڈٹ آتے دانستہ وڑاٹ سلنگ نا گواچی کننگا، شونداری ڈٹ آتے اولیتی بنداو آ پورو کننگک، وزیراعظم شہباز شریف

اسلام آباد۔ 06 اکتوبر (اے پی پی) وزیراعظم محمد شہباز شریف پارینے کہ قوم ملکی شونداری نا دشمن تے درست کرینے، تدوک آ چار سال اٹی سی پیک ڈٹ آتے دانستہ وڑاٹ سلنگ نا گواچی کننگا، شونداری ڈٹ آتے اولیتی بنداو آ پورو کننگک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او چائنا روڈ اینڈ برج کارپوریشن نا نائب صدر ژی چنگیان (Ye Chengyin)نا کماشی ٹی ڈل اتون گپ وتران کرسا کرے ہرا پنچ شنبے نادے آ داڑے اوڑتون اوڑدہی کریر۔ داوخت آ بنجائی وزیر ڈٹ بندی احسن اقبال، خصوصی کمکار جہانزیب خان، ظفرالدین  محمود ساڑی وخت اس کہ بنجائی وزیر سمندری امور سید فیصل سبزواری بذریعہ ویڈیو لنک ساڑی ئسک۔ داوخت آ وزیراعظم پارے کہ حکومت اولیتی بنداو تیا چین پاکستان اقتصادی راہداری نا ڈٹ آتے پورو کننگ ءِ۔ تدوک آ چار سال اٹی سی پیک ڈٹ آتے دانستہ وڑاٹ سلنگ نا گواچی کننگا۔ قوم ملکی شونداری نا دشمن تے درست کرینے۔ وزیراعظم پارے کہ نن ملک و قوم انا پیسہ غاتا رکھ اکن الس ءِ جوابدہ اُن۔ حکومت شونداری ڈٹ آتیٹی شفافیت ءِ پک کننگ ءِ۔ شونداری ڈٹ خاص کر السی وڑنا ڈٹ آتے اولیتی بنداو تیا پورو کننگک۔ پاکستان و چین دیرینہ سنگت ءُ ہرافتا برادرانہ تعلقداری دہائی تیا تالان ءِ۔ چین پاکستان نا ہر مشکل وخت اتون تفینے۔ ساڑی آ نوکاپ و پِر تیٹی چین نا کمکاری آ کنتون اوار مچ آ قوم صدر شی جن پنگ و چینی الس نا منت وار ءِ۔ وزیراعظم شہباز سی پیک نا رداٹ ڈٹ آتے اولیتی بنداو تیا مقررمداٹی پورو کننگ نا پارت کرے۔ اوڑدہی ٹی وزیر اعظم ءِ چندی برجا و پورو مروک میگا پروجیکٹ آتیا سرجم حوال تننگا۔ داوخت آ وزیراعظم ءِ پاننگاکہ قراقرم ہائی وے۔ ٹو کے حویلیاں آن تھاکوٹ سیکشن ءِ پورو کننگانے ہراڑا ٹریفک رواں دواں ءِ وخت اس کہ اونا فیز۔ ٹو تھاکوٹ آن رائے کوٹ آ ہم کاریم بناکرینے۔ کراچی کوسٹل ڈویلپمنٹ پراجیکٹ ، رشکئی اسپیشل اکنامک زون، کراچی کوسٹل ڈویلپمنٹ پروجیکٹ، رشکئی اسپیشل اکنامک زون، کراچی حیدر آباد موٹروے M9، بابو سرٹنل، ایم ایل ۔1و کراچی پورٹ ٹرسٹ آن PIPRIریلوائی کوریڈور نا ڈٹ آتیا ہم پیش رفت آن سرجمی اٹ معلومدار کننگا۔ وزیراعظم ءِ پاننگاکہ سی آر بی سی وزیراعظم نا سی پیک نا ڈٹ آتے اولیتی بنداو ومقرر مد انا تہہ ٹی پورو کننگ نا گام گیج آتا خیرمقدم ءِ کیک، داکان بیدس سی آربی سی 10 ہزار میگاواٹ نا سولر ائزیشن نا ڈٹ آتیٹی زرکاری ٹی بھاز است خواہی نا درشانی ءِ کرے۔ داوخت آ وائس پریذیڈنٹ سی آر بی سی وزیراعظم شہباز شریف ءِ نوکاپ زہمی تا کمک نا وڑاٹ وزیراعظم فلڈ ریلیف فنڈ اکن 1 لکھ ڈالر نا چیک اس ہم پیش کرے۔ وزیراعظم تعلقدار کمامدارآتے دا ڈٹ آتا بابت غٹ المی گام گیج آتے زوت پورو کرسا اوفتیا کاریم نا بناءِ کننگ نا پارت جاری کرے۔