کمک نا پنڈ خواپنہ، کچٹی تالان کروک آ ملک آتیان چاگڑدی انصاف خوانہ، مالی کمکاری وام تا دروشم اٹ بایدے مف، وزیراعظم شہباز شریف نا انٹرویو

اسلام آباد۔ 06 اکتوبر(اے پی پی) وزیراعظم محمد شہبا زشریف پارینے کہ او بھسکار نوکاپ آن پد کمک نا پنڈ خواپک بلکن او کچٹی تالان کروک آ ہزگار ملک آتیان چاگڑدی انصاف خواہک، نن مالی کمکاری نا ہیت ءِ کننگ اُن ولے دا پین وام تا دروشم اٹ بایدے مف، جہانی برادری نوکاپ زہمی تا بحالی و پوسکن تفنگ کن پین گچین و بھلا ڈٹ آتون مون آ بایدے برے۔ داخیال آتا درشانی ءِ او برطانوی اخبار’’دی گارڈین‘‘ ءِ انٹرویوٹی کرے۔ اوپارے کہ نوکاپ آن پاکستان اٹی بھاز بھسکاری مسنے ننے نوکاپ آن پد کچٹی تالان کروک آ ہزگار ملک آتا مون آ کشکول ءِ توننگ آ بیوس کننگ مفک، اوفتے جہانی برادری آن چاگڑدی انصاف درکار ءِ۔ وزیراعظم خبڑدار کرے کہ پاکستان ءِ بشام نا ترند پِر تیان پد جان جوڑی، خور انا رکھ و عارضی وڑاٹ بے اُرا مروک آ بندغ آتا بحالی کون آ بھلا چیلنج مون تروک ءِ، دا ترند انگا پِر تیٹی بھسکار نوکاپ نا سوب آن ملک انا سہ یک بشخ ءِ دیر ہرفینے، گڑاس علاقہ غاتیٹی بھاز طوفانی پِر مس۔ شہباز شریف پارے کہ ای تینا زند اٹی داخہ بھلو کچ اسے آ بھسکاری و تینا الس نا مصیبت آتے خنتنوٹ، او تینا ہی ملک اٹی چاگڑدی آن زہمی مہاجر جوڑ مسنو۔ اوجہانی برادری نا کنڈآن تروک آ ارب روپئی نا فنڈ، عطیہ و پین کمک نا قول آتے گنج اس مفننگ گوندسا پارے کہ دا چاگڑدی بدلی آن ننا ملک اٹی مروک آ بھسکاری ننا زرگزرانی وسیلہ غاتیان پیشن ءِ ، ننتون دوئی وسیلہ و گرج آتا نیام اٹ پرخ بھاز زیات ءِ ہرادے پہ دے پین ودنگ ءُ۔ وزیراعظم چاگڑدی انصاف نا بابت پیدوار کرسا پارے کہ نن کس اسے آ دوبہ خلنگ اٹی افن، نن انتس کہ خننگ اُن داننا کروک اُس اف بلکن نن دا ڑان زہمی اُن، انت ای کشکول ءِ ہرفسا کمک نا اپیل کیو؟ دانا انصافی اسے وغیر شفافیت ءِ۔ اوپارے کہ نن چین و پیرس کلب تون اوار غٹ اتون درملکی وام تا معطلی نا گمان تیا گپ وتران کننگ اٹی اُن، پاکستان ہچ ءُ حالیت اسے ٹی نادہندہ مفک۔ نن مالی کمکاری نا ہیت ءِ کننگ اُن ولے دا پین وام تا دروشم اٹ بایدے مف۔ وزیراعظم پارے کہ او ہمدردانہ بیان تیا منت وار ءِ ولے دا پڑوآتے عملی گام گیج آتیٹی بدل کننگ بھاز اہم ءِ، جہانی برادری گچین کاریم کننگ ءِ ولے دا گنج اس افس، او نوکاپ زہمی تا بحالی و تعمیر نو کن پین گچین و بھلا ڈٹ آتون مون آ برے۔ شہباز شریف پارے کہ ہزگار ملک آک اسہ دہائی اس مست پدتموک ملک آتیکن موسمیاتی ہلہلہ ئی حالیت آتون مون تننگ کن اسہ سال اٹی 100 ارب ڈالر چاگڑدی فنڈ اٹی تننگ نا قول کریسس، دازرآک ہراڑے کن ءُ؟ ہزگار ملک آتیکن تینا قول ءِ پورو کننگ نا دا جوان ءُ وخت اسے۔ اوپارے کہ نن تلافی نا پاپننگ اُن، کنا خیال ءِ کہ داوخت آ تلافی نا ہیت ءِ کننگ جوان اف، ولے ای انتس کہ پاننگ اٹی اُٹ اوفک داحالیت آتا بایدے نوٹس ءِ ہلیر و زمواری نا درشانی ءِ کیر۔ اوپارے کہ نئے بیرہ پاکستان بلکن دنیا کن داکان مہالو کہ ہرے مرے و نسخان آتا تلافی ممکن مف، اوفک دمدستی گام گیج کیر۔