اسلام آباد۔ 05 اکتوبر (اے پی پی) صدر مملکت ڈاکٹر عارف علوی بیداد ڈوہ تا دوبہ پک مننگ آ پاہو نا سزا کنوک آ پنچ ڈوہدار تا رحم نا اپیل آتے مسترد کرے۔ ایوان صدر نا پریس ونگ انا کنڈآن چارشنبے نادے آ جاری بیان نا رداٹ صدر مملکت محمد شعبان ولد محمد انور نا رحم نااپیل ءِ مسترد کرے، محمد شعبان ءِ مسہ سال انا چناسے تون زیاتی و کسفنگ نا ڈوہ اٹی پاہو نا سزا بِنفنگاسس۔ محمد عمران ولد فقیر محمد نا رحم نا اپیل ءِ ہم مسترد کننگا، محمد عمران اُرائی جھیڑہ غان پد تینا زائیفہ و اِرا مسڑ ءِ کسفیسس۔ صدر مملکت محمد افضل ولد محمد اصغر علی نااپیل ءِ ہم مسترد کرینے، محمد افضل ءِ لمہ و باوہ و 6 ایڑھ ایلم تتون اوار تینا خاہوت نا 8 بندغ آتے کسفنگ آ پاہو نا سزا بنفنگاسس۔ صدر ڈاکٹر عارف علوی محمد اکبر و محمد اصغر ولد محمد اکرم نا رحم نا اپیل ءِ ہم مسترد کننگا، محمد اکبر و محمد اصغر اِرا بندغ ءِ چنکو جھیڑہ اسے آن پد کسفیسر۔ صدر مملکت آئین نا آرٹیکل 45 نا رداٹ دا اپیل آتے مسترد کرینے۔ آئین نا آرٹیکل 45 نا رداٹ صدر مملکت ہرعدالت، ٹریبونل یا ایلو اتھارٹی تا کنڈآن تروک آ سزاتے بشخنگ، معطل کننگ یا کم کننگ نا اختیار تخک۔
