اسلام آباد۔ 05 اکتوبر (اے پی پی) بنجائی وزیر میاں جاوید لطیف پارینے کہ مچ آ انتظامی پنجر ریاست نا ملازم ءِ، اسہ صوبہ اسے نا ہم مشینری ءِ مرکز نا برخلاف کاریم اٹ اتنگ مفک،اگہ ادارہ اس اسہ جماعت اسے نا کمکار مریک تو آئین نا رداٹ کارروائی مریک، سائفر آ کمیٹی اس جوڑ کننگانے ہرکس کہ زموار مریک اونا برخلاف ایکشن مریک۔ چارشنبے نادے آ داڑے پریس کانفرنس آن تران کرسا اوپارے کہ الس ہمو گڑاتا خوڑتی اٹ جاچ ءِ ہلنگ ءِ ، پشاور اٹی مخلوق آن ہرارداٹ سوغند ہلنگ انگ ءِ، داجہادیک پار کہ او دِنا برخلاف جہاد نا سوغند ہرفنگ ءُ۔ اوپارے کہ چوہدری فواد حسین پارے کہ اسہ فریق تون مذاکرات مننگ اٹی ءِ و حکومت بایدے اونا بشخ مرے، حکومت تون اوار اسٹ اس ہم غیر آئینی کاریم تا بشخ جوڑ مننگ کپک، ننے مذاکرات اٹ ہرا حیثیت اٹ تولفنگ نا ہیت کننگ ءِ، عمران خان نا جہد غیر آئینی ءِ۔ اوپارے کہ ادارہ غاتے بھاشن تننگ نا است خواہی تخوک آتون مذاکرات امر مننگ کیک، عمران خان پاکستان نا سالمیت ، آخبت و زرگزران نا برخلاف ہرا ہیت آتے کرینے اوفتے است آن دننگ مفک، نواز شریف ہرا زندان تے سگا و بے لاگ احتساب نا چکی آن اودے گدریفنگا، نن وخت اس کہ کس اسے چوکیدار، میر جعفر یا میر صادق پاتننن۔ نن مدام ادارہ غاتیٹی تولوک غلط بندغ آتا پیدواری ءِ کرین ہراننا فرض ئسک۔ اوپارے کہ عمران خان ءِ لاڈکا جوڑ کننگے، قوم دادے سگپک۔ اوپارے کہ نواز شریف نا انصافی تا مقابلہ ءِ کرینے و 6 سال اسکان عدالت آتیٹی دِکہ کُننگ آن پد ننے بے گناہی نا سرٹیفکیٹ ملانے، وخت اس کہ عمران خان نا دھڑکو و غیر مشروط معافی آن پد ہم اودے معافی ملا ولے نن کس اسے تون نا انصافی خواپنہ ، ننا نقطہ نظر دادے کہ غٹ اتون آئین و کانود نا رداٹ مون تننگے۔ اوپارے کہ اگہ غٹ ءِ رُمب اٹی زیروآن بناکرفپننگک تو داڑآن لیول پلیئنگ فیلڈ پاننگ مفک۔ اوپارے کہ کنتون اوار اسٹ اس ہم ڈیل انا سجفپک نئے کس اسےڈیل کننگ کن اِلینہ ۔ داسہ بھاز مس سائفر تون اوار قاسم سوری و شوکت ترین آئین تون انتس کریر اوڑآ نن مقدمہ جوڑ کینہ۔ اوپارے کہ مچ آ انتظامی پنجر ریاست نا ملازم ءِ، صوبائی مشینری ءِ مرکز نا برخلاف کاریم اٹ اتنگ مفک، اگہ ادارہ اس اسہ جماعت اسے نا کمکار مریک تو آئین نا رداٹ کارروائی مریک، سائفر آ کمیٹی اس جوڑ کننگانے ہرکس کہ زموار مریک اونا برخلاف سخت ایکشن مریک، عمران خان ہمو ہیت آتے کننگ ءِ ہرافتے علی وزیر وخت اس ہم کتنے، سائفر باندات آ کمیٹی نا سروک اسہ سویلین اسے ، ہرا راستکی تے پک کننگ آن پد فیصلہ سے آ سرمریک۔ اوپارے کہ کمیٹی نا فیصلہ غا من و عن عمل ہم کننگک ہرکس کہ زموار پک مس اونا برخلاف کانود نا رداٹ کارروائی کننگک۔
