کوئٹہ۔ 05 اکتوبر (اے پی پی) سینیٹر ثمینہ ممتاز زہری اوغانستان و پاکستان اٹی دہشت گردی نا ساڑی آ واقعہ غاتیا است ہسونی نا درشانی ءِ کرسا اوفتا مذمت ءِ کرینے و پارینے کہ پاکستان واوغانستان اٹی اناگت امن و ایمنی نا حالیت آتیٹی خرابی و دہشت گردانہ جلہو آتا پد اٹ ننا ازلی دشمن بھارت نا دو ءِ ہراخواپک کہ پاکستان و اوغانستان اٹی امن مرے۔ اوپارے کہ دا حقیقت ءِ کہ اوغانستان اٹی حالیت آتا خراب مننگ نا دروشم اٹ اونا غٹ آن زیات اثر پاکستان آ تمک۔ ملک دشمن زموار آک وطن عزیز نا شونداری و شونہالی و امن و ایمنی ءِ سگپننگ ءُ، و تینا ناپاک مسخت آتا دوئی کننگ کن سجفوک ڈٹ انا رداٹ کودک شاری و سیکورٹی فورس آتیا لغوری جلہو کننگ ءُ، ہرانا مذمت ءِ کینہ ودشمن ءِ دا باور کرفنگ خوانہ کہ داوڑنا لغوری جلہو سنبرینگوک قوم انا حوصلہ ءِ پست کننگ کپک۔ اوپارے کہ دشمن ومفاد پرست زموار آک لمہ وطن پاکستان نا شونداری و شونہالی و امن وایمنی نا حالیت آتیان خوش افس و تینا ناپاک مسخت آتا دوئی کننگ کن داوڑنا کارروائی کیرہ ولے مچ آ قوم ، پاک فوج و ایلو سیکورٹی فورس آک مدام ملک دشمن زموار آتا ناپاک عزم ءِ مش تا کرسا اوفتا بیخ ءِ کشانو۔ ننا سیکورٹی فورس آک بھلا قربانی تیان پد ملک آن دہشت گردی ءِ چٹفینو۔ اومچ آ قوم خاص کر ورناتے مخاطب کرسا پارے کہ ننا غٹ انا قومی فرضءِ کہ امن و ایمنی نا گچینی و وطن نا رکھ اکن تینا کڑد ءِ ادا کین و دشمن ءِ باور کرفن کہ پاکستانی قوم دہشت گردی نا برخلاف یکجا و اسہ پلیٹ فارم آٹی ءِ۔
