اسلام آباد ۔ 05 اکتوبر (اے پی پی) بنجائی وزیر حوالکاری وشینکاری مریم اورنگزیب عمران خان ءِ لانگ مارچ نا تاریخ تننگ آن مست گڑاس اہم سوج آتا ورندی ءِ تننگ نا چیلنج ترسا پارے کہ قومی سلامتی اتون گوازی کروک آ فارن ایجنٹ اسلام آباد آ انت کننگ کن بننگ ءِ؟ نوکاپ زہمی تا کمک ءِ کننگ نا جاگہ غا لانگ مارچ انا تیاری، زرگزران بھس، 20 ہزار ارب نا تاریخی وام ہلوک آ فارن ایجنٹ دروغ تڑ اسلام آباد آ انت کننگ کن بننگ ءِ؟ چارشنبےنادے آ عمران خان نا لانگ مارچ نا بابت تینا بیان اٹی بنجائی وزیر حوالکاری سوج کرے کہ پاکستان نا زرگزران ءِ خواتہ کننگ نا کوشست کروک آ فارن ایجنٹ اسلام آباد آ انت کننگ کن بننگ اٹی ءِ؟ اوپارے کہ فارن ایجنٹ 95 لکھ مخلوق ءِ بےروزگار کرے، 2 کروڑ بندغ آتے نیزگاری نا جہنم اٹی دِکہ تس، داسہ او اسلام آباد آ انت کننگ کن بننگ ءِ؟ اوپارے کہ عدلیہ و جج آتے دھڑکوتننگ، ادارہ غاتیا ہیت تخنگ و سیاست اٹی گِرکروک آ اسلام آباد آ انت کننگ کن بننگ ءِ؟ اوپارے کہ کشمیر فروش فارن ایجنٹ اسلام آباد آ انت کننگ کن بننگ ءِ؟ توشہ خانہ نا دُز، فرح گوگی ، پیرنی نی کرپشن نا شریک ڈوہدار اسلام آباد آ انت کننگ کن بننگ ءِ؟ بنجائی وزیر حوالکاری پارے کہ عمران خان اول دا سوج آتا ورندی ءِ ایتے و ولدا لانگ مارچ انا پڑو ءِ کے۔
