واشنگٹن۔ 05 اکتوبر (اے پی پی) امریکہ ٹی پاکستان نا سفیر مسعود خان فنڈریزنگ دود اٹی پاکستان اٹی نوکاپ آن مروک آ بھسکاری تے مون آ تخسا پارینے کہ نوکاپ نا سوب آن لکھ آ بندغ بے اُرا مسنو ہرافتیان زالبول و چناتے بھاز مشکل آتون مون تروئی تمنگ ءِ ہرا داوخت آ عارضی جاگہ غاتیا رہینگ انگ ءُ۔ دا فنڈ ریزنگ دود ءِ کینیڈا نا چیریٹی تنظیم ریفیوجی گرلز ورلڈ وائڈ(آرجی ڈبلیو) نا کنڈآن اڈتننگا ہراترکی، فلسطین، یوکرین، پاکستان وکینیڈا ٹی پناہ گزین زالبول آتا گچین کن کاریم کننگ اٹی ءِ۔ پاکستانی سفارت خانہ نا کنڈآن جاری کروک پریس ریلیز نا رداٹ اوپارے کہ چاگڑدی بدلی تا سوب پاکستان اٹی نوکاپ نا سوب آن زہمی بندغ آک عارضی جاگہ غاتیا رہینگ انگ آ بیوس ءُ ہرافتے داوخت آ بھاز مشکل و مصیبت آتا مون تروک ءِ و اوفتے دا مشکل وخت اٹی جہانی برادری نا دمدستی چکار و مریس مدتی عزم انا گرج ءِ۔ دود اٹی اہم پاکستانی شخصیت آک، سخیک و امریکی محکمہ خارجہ و پاکستانی سفارت خانہ نا عہدیدار آک بشخ ہلکر۔ اوخاص وڑاٹ آفت آتیٹی مسن تا گچینی کن آرجی ڈبلیو نا کوشست آتا ستاءِ کرسا پارے کہ پسماندہ تپہ غاتیکن ننا ہمدردی و کمک ننا مہذب مننگ و انسانی ہمدردی تخنگ نا ڈیک ءِ۔ پاکستانی سفیر پارے کہ نوکاپ نا سوب آن 3 کروڑ 30 لکھ بندغ زہمی مسنو ہرافتیان 70 درسد آن زیات زالبول و چناک اوار ءُ وخت اس کہ 6 لکھ پڈ پُر زالبول آتیان 2 ہزار زالبول ہڑدے بے رکھ و غیر صحت مند حالیت آتیٹی چناتے ودی کننگ ءُ۔ اوپارے کہ معدہ نا انفیکشن، ڈینگی اِل، ملیریا و دیر آن ودی مروک آایلو ناجوڑی تا سوب آن بھسکاری نا تہہ ٹی اسہ پین بھسکاری اس ودی مسنے۔ اونوکاپ نا سوب آن ریسکیو اینڈ ریلیف آپریشن تیٹی امداد نا فراوانی آ امریکی حکومت ، سول سوسائٹی، سخی و خاص وڑاٹ پاکستان امریکن کمیونٹی نا منت واری ءِ ہرفے و جہانی برادری آ زور شاغا کہ او تعمیر نو و بحالی ٹی کمک کن مریس مدتی وزم انا درشانی ءِ کے۔ داوخت آ امریکی محکمہ خارجہ غان کرسٹوفر جیسٹر نوکاپ زہمی تیکن امریکی امداد نا حوالہ ءِ ترسا پارے کہ نوکاپ زہمی تا بحالی و تعمیر نو ءِ ممکن کننگ کن پوسکن آوڑوڈول آتا گرج ءِ۔ پاکستانی سفیر مسعود خان پاکستان نا چاگڑدی بدلی نا سوب آن زہمی بندغ آتیکن آرجی ڈبلیو نا آفس ہولڈر آتا پبی کوشست آتا ستاءِ کرے۔
