عمران خان نا دروغ و درو آ تالان پالیسیک ملکی زرگزران ءِ بھس کرینو ہلانو ، وزیراعظم شہباز شریف نا ’’دی گارڈین ‘‘ ءِ انٹرویو

اسلام آباد۔ 04 اکتوبر (اے پی پی) وزیراعظم محمد شہباز شریف پارینے کہ عمران خان کرہ ارض آ غٹ آن زیات دروغ تڑوک آ بندغ ءِ  ہرااقتدار آن محروم مننگ آن پد راج اٹ خار انا زیار شاغنگ ءِ، عمران خان نا دروغ و دُرو آ تالان پالیسیک ملکی زرگزران ءِ بھس کرسا تخانو۔ اقوام متحدہ نا جنرل اسمبلی نا دیوان نا وخت آ جہانی راہشون تا عمران خان نا بارواٹی خیال آتے بنگٹ حیران مسٹ، اوسنگت ملک آتون تعلقداری تے بے سوب نسخان تس، نومبر اٹی چین نا دورہ ءِ کیوہ۔ برطانوی اخبار ’’دی گارڈین‘‘ ءِ انٹرویو ٹی وزیراعظم شہباز شریف پارے کہ عمران خان تینا جند انا ایجنڈاکن کرپشن نا چٹفنگ ءِ تینا منشور جوڑ کرسا پیش کرے ولے او پاکستانی تاریخ نا غٹ آن زیات بے آزموندہ کار، خودپسند، اناپرست و ناپختہ سیاستدان پک مس۔ اوپارے کہ لیک مروک آ آڈیوتیان داہیت پک مریک کہ عمران خان کرہ ارض آ غٹ آن زیات دروغ تڑوک آ بندغ ءِ و داہیتءِ ای خوشی اٹ پاننگ اٹی افٹ بلکن دا ننکن شکی گری و گڑتی نا سوب ءِ انتئے کہ عمران خان نا جند انا ایجنڈا و مسخت آتیکن تڑوک آ دروغ آن ننا ملک انا تشخص ءِ نسخان رسینگانے۔ وزیراعظم پارے کہ عمران خان ءِ تینا غٹ دانستہ ڈوہدار گام گیج آتیکن جوابدہ مروئی تمک۔ وزیراعظم پارے کہ اوداکان مست وخت اس ہم ملک انا آخبت نا بابت فریشان اَلوکہ، عمران خان راج اٹی داخہ خار و زیار شاغانے ہراداکا ن مہالو اسُل اَلوکہ۔ وزیراعظم پاکستان نا ایلو ملک آتون تعلقداری تے دُوارہ استوار کننگ نا بابت تینا کوشست آتا ذکر ءِ کرسا پارے کہ او اقوام متحدہ نا جنرل اسمبلی نا دیوان نا وخت آ ہمووخت آ حیران مس ہراتم چندی جہانی راہشونک اوڑتون اوڑدہی ٹی عمران خان نا رویہ نا ذکر ءِ کریر، گڑاس راہشونک کنے عمران خان نا شخصیت نا بابت ذاتی وڑاٹ معلومدار کریر کہ او (عمران خان ) ناشائستہ رویہ تخوک، دروغ تڑ و خودپسند ئسک۔ شہباز شریف پارے کہ عمران خان  امریکہ تون پاکستان نا تعلقداری تے بے سوب نسخان تس۔ اوپیدوار کرے کہ او پاکستان نا چین اتون خڑکی تعلقداری تے دُوارہ گچین جوڑ کیک  ہرافتے عمران خان نا کنڈآن چین پاکستان اکنامک کوریڈور(سی پیک) ءِ مبینہ وڑاٹ توننگ نا سوب آن نسخان رسینگا۔ وزیراعظم دا ڈٹ ءِ برجاتخنگ نا عزم انا درشانی ءِ کرسا پارے کہ او نومبر اٹی چین، ہراپاکستان نا غٹ آن زیات آزموندہ سنگت ءِ، نا دورہ ءِ کیک۔ اوپارے کہ سی پیک نئے بیرہ پاکستان بلکن مچ آ ڈیہہ نا گچینی کن اسہ جوان ءُ ڈٹ اسے۔ وزیراعظم مسلم لیگ (ن) نا قائد نواز شریف تون حکومتی امور اٹی سلابت نا بابت اسہ سوج اسے نا ورندی ٹی پارے کہ نواز شریف اونا راہشون و بھلا ایلم ءِ، و اواوڑتون مشورہ کیک ولے او کنے فیصلہ کننگ کن پورو اختیار تسنے۔ خاہوتی سیاست نا بابت عمران خان نا تنقید ءِ مسترد کرسا اسہ سوج اسے نا ورندی ٹی وزیراعظم پارے کہ دا خاہوت سیاست نا باندات اف بلکن دا اہلیت، السی مخ تفی و الس نا پت ءِ کٹنگ نا ہیت ءِ۔