اسلام آباد۔ 04 اکتوبر (اے پی پی) بنجائی وزیر خزانہ و محصولات سینیٹر محمد اسحاق ڈار پارینے کہ حکومت زرکار و کاروبار کن زیات آن زیات آسراتی فراوان کننگ کن چندی اصلاحات آتیا عمل کننگ ءِ۔ او داہیت ءِ سے شنبے نادے آ داڑے پاکستان اٹی قطر انا سفیر شیخ سعود بن عبدالرحمان بن فیصل الثانی تون اوڑدہی ٹی گپ وتران کرسا پارے۔ وزیرخزانہ قطر انا سفیر ءِ جم و جوش اٹ بخیر کرسا قطر انا الس و سرکڑدہ غاتیکن نیک است خواہی نا درشانی ءِ کرے۔ وزیرخزانہ ہڑتوم آ ایلم ملک آتا نیام اٹ دیرینہ تین پہ تینی تعلقداری تے تالان کرسا پارے کہ ساڑی حکومت پاکستان اٹی زرکار وکاروبار ءِ زیات آن زیات آسراتی فراوان کننگ کن چندی اصلاحات آتیا عمل کننگ ءِ۔ وزیرخزانہ قطر انا سفیر ءِ پاکستان نا چندی بشخ آتیٹی زرکاری نا دوئی کٹیائی وارخواہی تیان ہم معلومدار کرے و قطر انویسٹمنٹ اتھارٹی نا کنڈآن پاکستان اٹی چندی واپاری و زرکاری نا بشخ آتیٹی 3 ارب ڈالر نا زرکاری نا ڈٹ آتا خیرمقدم ءِ کرے۔ قطر انا سفیر اسحاق ڈار ءِ وزیر خزانہ نا منصب ءِ سنبھالنگ آ مبارکبادی تس و اوڑتون گرم جوشی نا جوزہ غاتا درشانی ءِ کرے۔ اوہڑتوم آ ملک آتا نیام اٹ ہڑتوم آ کنڈآتا اقتصادی تعلقداری تے پین سوگو کننگ کن پاکستان نا چندی بشخ خاص وڑاٹ توانائی ، واپار و کاروبار اٹی زرکاری کن قطر انا حکومت نا ارادہ غان ہم معلومدار کرے۔ وزیرخزانہ زرکاری نا سلاہ تا خیرمقدم ءِ کرسا قطر انا سفیر ءِ تینا ہرممکن کمکاری نا باوری کرفے۔
