اسلام آباد۔ 04 اکتوبر (اے پی پی) بنجائی وزیر ڈٹ بندی، شونداری، اصلاحات و خصوصی گام گیج احسن اقبال پارینے کہ نارووال اسپورٹس سٹی ڈٹ انا کل خڑچ 2.9ارب روپئی ئسک، مئی 2018 اسکان 2.2 ارب خڑچ مسوسس، نیب کیس انا سوب آن ڈٹ آ 2018 آن کاریم ءِ توننگا۔ داخیال آتا درشانی ءِ او تینا کماشی ٹی نارووال اسپورٹس سٹی ڈٹ انا جاچ دیوان اٹی گپ وتران کرسا کرے۔ دیوان اٹی وزارت بین الصوبائی رابطہ، اسپورٹس بورڈ انا کمامدار و کنسلٹنٹ آک بشخ ہلکر۔ دیوان اٹی بنجائی وزیر پارے کہ ڈٹ انا کل خڑچ 2.9 ارب روپئی ئسک مئی 2018 اسکان 2.2 ارب خڑچ مسوسس۔ نیب کیس انا سوب آن ڈٹ آ 2018 آن کاریم ءِ توننگا۔ اوپارے کہ نیسپاک رپورٹ پیش کرے کہ ایلو 78 کروڑ روپئی نا جاگہ غا ڈٹ ءِ پورو کننگ کن داسہ 2.9 ارب روپئی درکار مریک۔ تاخیر نا سوب آن کنٹریکٹر کلیمز و نہاد آتیٹی ودکی نا سوب آن ڈٹ آ 2.2 ارب روپئی نا ودکی خڑچ بریک۔ 2.2 ارب نا ودکی خڑچ انا دیر اس زموار ءِ؟ احسن اقبال پارے کہ عمران نیازی و مسکوہی چیئرمین نیب جاوید اقبال آن بایدے وصول کننگے۔ ڈٹ ءِ سیاسی انتقامی کارروائی تا شست جوڑ کرسا ملک انا ارب آ روپئی نا نسخان کرفنگا۔ ڈٹ ءِ شش تُو اٹی پورو کننگے۔ ورناتیٹی گوازی تا مون آ دننگ کن ملک اٹی داوڑنا چندی ڈٹ جوڑ کینہ۔
