اسلام آباد۔ 04 اکتوبر (اے پی پی) وزیراعظم نا خصوصی کمکار نارکوٹکس کنٹرول عطاء تارڑ پارینے کہ عمران خان ءِ نوکاپ آن زہمی تا حالیت تون ہچ ءُ کاریم اس اف ، اودے بیرہ تینا فکر ءِ، او تینا سیاست ءِ چمکائفنگ کن ریاست آ جلہو ءِ برجاتخانے، چوکیدار درواسکان جوان ئسک و اینو دُزی تا پیدواری آ خراب لگنگ ءِ۔ داخیال آتا درشانی ءِ او سے شنبے نادے آ پریس انفارمیشن ڈیپارٹمنٹ اٹی پریس کانفرنس آن تران کرسا کرے۔ اوپارے کہ اینو ای نے چوکیدار و دُز انا سفت ءِ پاوہ و داہم پاوہ کہ دُز انا انت کڑد اسے و چوکیدار نا کڑد انت ءِ؟ اسہ ہندن ءُ بندغ اس ہرانا اِرا صوبہ پنجاب و خیبرپختونخوا ٹی حکومت ءِ، گلگت بلتستان و آزاد کشمیر اٹی ہم حکومت ءِ اودے نوکاپ آن زہمی مخلوق نا حالیت زار تون ہچ ءُ کاریم اس اف، اودے بیرہ تینا سیاست نا فکر ءِ، او تینا سیاست ءِ چمکائفنگ کن ریاست آ جلہو ءِ برجاتخانے، آڈیو لیک اٹی ہراتم وار وار آ اَرفنگا کہ انت امریکہ نا پن ءِ ہلوئی ءِ تو ورندی بس (ایبسلوٹلی ناٹ) انا حقیقت دادے کہ وار وار تینا پارٹی نا باسک آتے وار وار تینا رفیق آتے دا تاکیدکننگک کہ اوڑتون گوازی کروئی ءِ، اوڑتون تماشہ اس خلوئی ءِ، اودے تینا سیاست ءِ چمکائفنگ کن کاریم اٹ اتنگ نا ءِ، ولے پن ءِ ہلوئی افک، پن ءِ داخاطرآن ہلوئی اف کہ داٹی حقیقت الوکہ۔ اسہ نجی چینل اسے انٹرویو ترسا عمران نیازی پاہک کہ او سائفر کنتون ئسک داڑے ایڑے مروئے۔ اوپارے کہ ای حیران اُٹ کہ اسہ کنڈآ اسد عمر نا ٹویٹ ءِ کہ سائفر گم مس، نی عمران خان آن ارفوسس کہ اسہ حساس ڈاکومنٹ اس ہرادے جیب آن کشسا جلسہ ٹی نشان تننگاسس او اسٹیج آن دڑنگسا جاگہ اس اودے خسا، انت او بنی گالہ غان غائب مس، دا پاکستان نا آفیشل سیکرٹ ایکٹ نا خلاف ورزی ءِ کہ بطور وزیراعظم نے اسہ حساس ڈاکومنٹ اس پیش کننگا و نی اودے اُراغا دیسہ و اُراغا دننگ آن پد نی اودے گم کیسہ و قومی ٹی وی آ داہیت انا اعتراف ءِ کیسہ کہ او کنتون ئسک ولے داسہ گم مسنے۔ داحالیت ءِ تحریک انصاف نا کہ ایلو راہشون و ترجمان اوداہیت آن بے سما ءُ کہ سائفر تو ویسٹ کوٹ نا جیب اٹی ئسک تو او امر گم مس و اونا گم مننگ نا زموار دیر ءِ؟ داہراتم دروغ انا بیانیہ اس گڑنگے ونی تینا سیاسی مینجمنٹ اٹ بے سہب مر کہ نی تینا ایم این اے تے سنبھالنگ کتویس و پت اناوونٹ اٹی نی تینا گیشتری ءِ برقرار تخنگ اٹ بے سہب مہ تو نی دوبہ دیر آ خلنگ اُس؟نی دادے جہانی سازش اس پارسا دانا زموار اسہ امریکہ ءِ گوندنگ اُس ہراکہ اسل دروغ و ٹوٹل منافقت اسے انتئے کہ پین منطق اس اَلوکہ و پین سوب اس سمجھ بتو۔ اینو ہراتم نا دُزیک مون آ بسنو تو اسل ویل ہندادے کہ چوکیدار نا دُزی تا پیدواری ءِ کرینے ، چوکیدار پارینے کہ نا اُراغان گھڑیک ہراوڑ غائب مسرہ۔
