پاکستان ءِ جہانی امداد نا گرج ءِ، اخس زیات و زوت پاکستان نا کمک مریک ہمو رفتار اٹ نن پین انسانی زند آتے بچفنگ نا قابل مننگ کینہ، سردار ایاز صادق

اسلام آباد۔ 04 اکتوبر (اے پی پی) بنجائی وزیر اقتصادی امور سردار ایاز صادق پارینے کہ پاکستان اٹی نوکاپ آن مروک آ بھسکاری موسمیاتی بدلی تا بابت دنیا کن ہکل  اسے، پاکستان ءِ داوخت آ جہانی امداد نا گرج ءِ، اخس زیات و زوت پاکستان نا کمک مریک ہمورفتار اٹ نن پین انسانی زند آتے بچفنگ نا قابل مننگ کینہ۔ سے شنبے نادے آ جنیوا ٹی اقوام متحدہ و پاکستان نا اسیجائی نظرثانی مروک فلیش اپیل نا دود آن تران کرسا بنجائی وزیر پارے کہ نن پہہ مرین کہ پاکستان اٹی ساڑی آ پِر تیان ہرا بھسکاری مسنے دا دنیا کن اسہ ہکل اسے۔ موسمیاتی بدلی تا بھلو نہاد اس پاکستان ءِ تروئی تما حالانکہ چاگڑد ءِ نسخان تروک آ گیس آتا پیش تمنگ اٹ پاکستان نا بشخ اسہ درسد آن ہم کم ءِ وخت اس کہ دا بدلی تیان زہمی مروک آ سرفہرست ملک آتیٹی پاکستان اوار ءِ، گرج داہیت انا ءِ کہ چاگڑدی بدلی تتون مون تننگ کن جہانی فنڈ اٹی پاکستان ءِ اونا بشخ ءِ تننگے۔ سردار ایاز صادق پارے کہ پاکستان اٹی داسال جون آن ہلیس ستمبر اسکان پدریسہ پِر مس و دا اسہ بھلو حالیت اس ئسک۔ روایتی وڑاٹ پاکستان اٹی دریاتیٹی طغیانی نا سوب نوکاپ برساکرینے ولے دا وار دا بھسکاری بھلا پِر تا دروشم اٹ آسمان آن نازل مس، گڑاس علاقہ غاتیٹی پدریسہ 8 آن ہلیس دہ دے اسکان پِر مس ہراڑآن ملک اٹی سڑک، ریلوائی ٹریک و بنداوی پنجر ءِ بھاز نسخان رسینگانے۔ ننا اندازہ ئسک کہ گڑاس علاقہ غاتیٹی 50 درسد زیات پِر مریک ولے چندی علاقہ غاک ہندن ءُ ہراڑے 700 آن ہلیس 1700 درسد اسکان زیات پِر ریکارڈ کننگا۔ اوپارے کہ پدریسہ پِر تا سوب آن انتظامیہ ہیلی کیپٹر آتا کمک اٹ ہم امداد سرکننگ آن قاصر ئسک۔ داوخت آ چندی علاقہ غاتیٹی نوکاپی دیر سلوک ءِ و ہندن ءُ دیر شیف مریک، ہموعلاقہ غاتیٹی پوسکن تفنگ و بحالی نا سرجزآتا بنامریک۔ بنجائی وزیر پارے کہ تعمیر نو و بحالی نا کاریم اسہ یا اِراتُو تیٹی آخا بلکن داٹی اسہ سال آن زیات نا وخت لگنگ کیک، پاکستان، اقوام متحدہ و امداد تروک آ ادارہ غاک نسخان نا شدت نا کساس ءِ خلکنو، پاکستان ءِ ارب آ ڈالر نا نسخان مسنے۔ پاکستان ءِ داوخت آ جہانی امدا د نا گرج ءِ، اخس زیات وزوت پاکستان نا کمکاری مریک ہمورفتار اٹ نن پین انسانی زند آتے بچفنگ نا قابل مننگ کینہ۔ اوپارے کہ ساڑی آ پِر ونوکاپ آن 1600 آن زیات انسان زوال کرینو، داکان بیدس کشت وکشار و لائیو اسٹاک ءِ بھاز نسخان رسینگا، 11 لکھ ساہدار ہم کسکنو۔ اوپارے کہ اگہ زہمی علاقہ غاتیٹی امداد وخت آ سرمفک تو خوانخواستہ پین زوال ہم مننگ کیک۔ زہمی علاقہ غاتیٹی جان جوڑی نا آسراتی تننگ المی ءِ، خاص کر زالبول و پوسکن ودی مروک آ چناتا جان جوڑی و غذائیت اہم ءُ ویل اسے ءُ۔ بنجائی وزیر پارے کہ مچ آ دنیا ءِ موسمیاتی بدلی تا خطرہ غاتون مون تننگ کن مون آ بروئی مریک ۔ اومستی پارے کہ پاکستان ءِ داوخت آ جہانی برادری وامداد تروک آ ادارہ غاتا کمک نا گرج ءِ۔